اسلام آباد : شبرزیدی کو اعزازی چیئرمین ایف بی آر تعینات کرنے کافیصلہ کرلیا گیا، نئے چیئرمین کی تقرری کا نوٹیفکیشن آج جاری ہونے کا امکان ہے، وزیراعظم نے ایف بی آر کے سینئر افسران کو شبر زیدی کے نام پر اعتماد میں لے لیا ہے۔
تفصیلات کے مطابق حکومت نے شبر زیدی کو اعزازی چیئرمین ایف بی آرتعینات کرنے کا فیصلہ کرلیا شبرزیدی بطور چیئرمین تنخواہ نہیں لیں گے لیکن چیئرمین کےتمام اختیارات ہوں گے۔
نئے چیئرمین کی تقرری کا نوٹیفکیشن آج جاری ہونے کا امکان ہے ، وزیراعظم نے ایف بی آر کے سینئر افسران کو شبر زیدی کے نام پر اعتماد میں لے لیا ہے۔
شبر زیدی نے اسلام آباد میں سینئر حکام سے ملاقاتیں کیں، کل ایف بی آر کےسینئرحکام نے وزیراعظم کے مشیرشہزاد ارباب سےملاقات کی تھی، جس میں ایف بی آر حکام نے چیئرمین کی تعیناتی کے حوالے اپنے تحفظات سے آگاہ کیا تھا، مشیر نے ایف بی آر حکام کو یقین دلایا تھا وہ وزیراعظم کو تحفظات سے آگاہ کریں گے۔
مزید پڑھیں : وزیر اعظم، شبر زیدی ملاقات: ملکی مالیاتی نظام سےمتعلق تبادلہ خیال
گذشتہ روز وزیر اعظم عمران خان سے نامزد چیئرمین ایف بی آر شبر زیدی نے ملاقات کی تھی ، ملاقات میں ملک کے مالیاتی نظام سے متعلق تبادلہ خیال کیا گیا اور ٹیکس کا نظام بہتر بنانے کی تجاویز پر مشاورت کی گئی، وزیراعظم عمران خان نے شبر زیدی کو نئی ذمہ داریوں اور حکومتی پالیسی سے آگاہ کیا تھا۔
یاد رہے وزارت قانون نے اسٹیبلیشمنٹ ڈویژن کی جانب سے اعتراض کے بعد ٹیکس امور کے ماہر شبر رضا زیدی کو اعزازی طور پر چیئرمین ایف بی آر تعینات کرنے کی سفارش کی تھی۔
وزارت قانون کی جانب سے شبر زیدی کو 2 سال کے لیے اعزازی چیئرمین ایف بی آر تعینات کرنے کی سمری تیار کی گئی ، سمری کے متن کے مطابق اسٹیبلشمنٹ ڈویڑن نے شبر زیدی کو باقاعدہ چیئرمین ایف بی آر تعینات کرنے پر اعتراض اٹھائے تھے اس لیے انہیں اعزازی طور پر چیئرمین تعینات کرنے میں کوئی قانونی یا آئینی رکاوٹ نہیں۔
یاد رہے کہ 6 مئی کو اسلام آباد میں سینئر صحافیوں سے گفتگو کے دوران وزیراعظم عمران خان نے شبر زیدی کو چیئرمین ایف بی آر تعینات کیے جانے کی تصدیق کی تھی، جس کے بعد ایف بی آر کے اندرونی حلقوں کی جانب سے اس کی شدید مخالفت کی گئی۔
