لاہور: محکمہ صحت پنجاب نے ہڑتالی ڈاکٹرز،نرسز،پیرا میڈیکل اسٹاف کے خلاف حتمی کارروائی کا فیصلہ کرلیا جس کے تحت تمام ملازمین کی فہرستیں طلب کرلی گئیں۔
نمائندہ اے آر وائی نیوز حسن حفیظ کے مطابق محکمہ صحت پنجاب نےہڑتالی ڈاکٹر،نرسزودیگرعملےکی فہرست طلب کرلیں اور اُن کے خلاف جلد حتمی کارروائی عمل میں لائی جائے گی۔
گرینڈ ہیلتھ الائنس نےگزشتہ 10روز سے مطالبات منظور نہ ہونے کی وجہ سے احتجاجاً کام بند کر رکھا ہے جس کی وجہ سے مریضوں کو شدید مشکلات کا سامنا ہے اور سرکاری اسپتالوں میں لوگ رُل رہے ہیں۔
محکمہ صحت پنجاب نے 12 بڑے اسپتالوں کے چیف ایگزیکٹو، ایم ایس کو مراسلہ جاری کیا جس میں ہدایت کی گئی ہے کہ اسپتالوں میں کام نہ کرنے والے ملازمین اور مریضوں کے علاج میں خلل ڈالنے والوں کے نام فوری طور پر فراہم کیے جائیں۔
مزید پڑھیں: ینگ ڈاکٹرز کا احتجاج، پنجاب کے اسپتالوں میں کام بند
محکمہ صحت کے مراسلے میں کہا گیا ہے کہ ڈاکٹرز، نرسز و دیگر عملے کی ہڑتال کے باعث مریضوں کو مشکلات کا سامنا کرنا پڑ رہا ہے، کل یعنی 11 مئی کی صبح دس بجے تک جو بھی کام کرنے پر رضامند نہ ہو ایسے ملازم کا نام وزارت کو ارسال کیا جائے۔
یاد رہے کہ پنجاب بھر کے ڈاکٹرز، پیرامیڈیکل اسٹاف اور نرسز سمیت دیگر عملے نے 10 روز سے احتجاج جاری رکھا ہوا ہے اور انہوں نے دو ٹوک مؤقف اختیار کیا کہ مطالبات منظور نہ ہونے تک احتجاجاً کام بند رکھا جائے گا۔
