ویانا: آسٹریا کی پارلیمنٹ میں پرائمری اسکولوں میں حجاب پر پابندی کا منظور کرلیا گیا۔
غیرملکی خبررساں ادارے کے مطابق آسٹریا کی پارلیمنٹ نے پرائمری اسکولوں میں حجاب پر پابندی کا بل منظور کرلیا، بل سخت گیر نظریات رکھنے والی دائیں بازو کی حکمراں جماعت نے آسٹرین اسمبلی میں پیش کیا۔
حکومتی جماعت اور اتحادیوں کی جانب سے بل کے حق میں ووٹ ڈالے گئے جبکہ اپوزیشن جماعتوں نے بل کی مخالفت کی۔
قانون میں سرڈھانپنے کو نظریاتی اور مذہبی نوعیت کا لباس قرار دیتے ہوئے پابندی عائد کی گئی ہے تاہم سکھوں کی مخصوص پگڑی اور یہودیوں کی مخصوص ٹوپی پر پابندی نہیں ہوگی۔
مزید پڑھیں: ڈنمارک میں نقاب پر پابندی عائد کردی گئی
دوسری جانب بل کی منظوری کے بعد کے بعد آسٹریا میں مسلم تنظیموں کی جانب سے شدید ردعمل دیکھنے میں آیا ہے۔
یاد رہے گزشتہ سال مئی میں ڈنمارک کی پارلیمنٹ نے عوامی مقامات پر خواتین کے نقاب پہننے پر پابندی کے قانون کی منظوری دی تھی، پابندی کے حق میں 75 جبکہ مخالفت میں 30 سے زائد ووٹ آئے تھے۔
خیال رہے کہ اس سے قبل فرانس، ہالینڈ، اور بیلجیم میں بھی نقاب پر پابندی عائد کی گئی تھی۔
