اسلام آباد: وزیر مملکت برائے ریونیو حماد اظہر نے کہا ہے کہ اثاثے ظاہر کرنے کی اسکیم سے تمام جعلی اکاؤنٹس کے اندراج اور بدعنوانی کے خاتمے کی راہ ہموار ہوگی۔
تفصیلات کے مطابق وزیرمملک برائے ریونیو نے کہا کہ ایمنسٹی اسکیم کا بنیادی مقصد تمام غیر قانونی اکاؤنٹس کو دستاویزی شکل دینا ہے۔
حماد اظہر نے کہا کہ اثاثہ جات ظاہر کرنے کی یہ اسکیم سابق حکومتوں کی اسکیموں سے مختلف ہے۔
انہوں نے کہا کہ اس اسکیم کے ذریعے موجودہ حکومت غیر قانونی اکاؤنٹس رکھنے والوں کو اندراج کا ایک موقع فراہم کررہی ہے بصورت دیگر ان کے خلاف سخت کارروائی کی جائی گی۔
ماضی کی حکومت نے معیشت کا بیڑا غرق کیا، مشکلات جلد ختم ہوجائیں گی، حماد اظہر
یاد رہے کہ گزشتہ ماہ وزیر مملکت برائے ریونیو حماد اظہر کا کہنا تھا کہ گزشتہ حکومت نے معیشت کا بیڑا غرق کیا، ماضی کی حکومتیں جو کرکے گئیں اس کے اثرات ہم بھگت رہے ہیں، مشکلات جلد ختم ہوجائیں گی۔
حماد اظہر نے پریس کانفرنس کرتے ہوئے کہا تھا کہ اسحاق ڈار نے معیشت سے متعلق غلط اعداد و شمار پیش کیے، ن لیگ کی حکومت کو موجودہ خساروں کا سامنا نہیں تھا، مہنگائی میں اضافہ روپے کی قدر میں کمی سے ہوا۔
