کراچی: وزیر اعظم عمران خان نے کہا ہے کہ نئے بلدیاتی نظام کے بعد سندھ میں کسی تقسیم کی ضرورت نہیں ہوگی.
ان خیالات کا اظہار انھوں نے پاکستان تحریک انصاف کی اتحادی جماعتوں کے وفد سے ملاقات کے موقع پر کیا، وفد میں ایم کیو ایم، جی ڈی اے اور پاکستان تحریک انصاف کے اراکین شامل تھے.
ملاقات میں سندھ کی مجموعی و سیاسی صورت حال، سندھ میں وفاقی حکومت کی جانب سے جاری مختلف ترقیاتی منصوبوں اور اتحادی امور پر تبادلہ خیال کیا گیا.
اس موقع پر وزیر اعظم عمران خان نے کہا کہ پی ٹی آئی سندھ میں ایک اور صوبہ بنانے کے خلاف ہے، ان کا کہنا تھا کہ پی ٹی آئی کے نئے بلدیاتی نظام کے بعد سندھ میں مزید صوبوں کی ضرورت نہیں رہے گا.
اس اجلاس میں فردوس شمیم نقوی، خرم شیر زمان، حلیم عادل شیخ، فیصل واوڈا، اشرف قریشی، ارباب غلام رحیم، نند کمار، نصرت سحر عباسی، صدرالدین شاہ راشدی اور دیگر شریک ہوئے.
مزید پڑھیں: پاکستان میں سیاحت سے متعلق بین الاقوامی سطح پر آگاہی کا فقدان ہے: وزیر اعظم
قبل ازیں وزیر اعظم ایک روزہ دورے پر کراچی پہنچے، اس موقع پر وزیر اعظم سے ایکسپو 2020 تھیم کمیٹی کے اراکین کی ملاقات ہوئی.
وزیر اعظم کا اس ملاقات میں کہنا تھا کہ قدرت نے پاکستان کو بے شمار نعمتوں اور صلاحیتیوں سے نوازا ہے، البتہ پاکستان میں سیاحت سے متعلق بین الاقوامی سطح پر آگاہی کا فقدان ہے.
