لاہور : پاکستان ریلوے کا عیدالفطر کے پُر مسرت موقع پر اضافی رش کے پیش نظر 5سپیشل ٹرینیں چلانے کااعلان کردیا ہے، عید ٹرینوں کی بکنگ کل 29 مئی سے شروع ہوجائے گی۔
تفصیلات کے مطابق پاکستان ریلوے نے عید پر اضافی رش کے پیش نظر 5 خصوصی ٹرینیں چلانے کااعلان کردیا ہے ، وفاقی وزیر ریلوے شیخ رشید احمد کی خصوصی ہدایت پر چیف ایگزیکٹو آفیسر پاکستان ریلوے محمد آفتاب اکبرکی منظوری کے بعد باقاعدہ شیڈول جاری کیا۔
شیڈول کے مطابق پہلی سپیشل ٹرین کراچی سٹی سے 2 جون کو صبح 10.45 بجے پشاور کے لئے روانہ ہو گی جبکہ دوسری عید سپیشل ٹرین 2 جون کو کوئٹہ سے دن 11.30 بجے راولپنڈی کے لئے روانہ ہو گی ۔
ترجمان پاکستان ریلوے کا کہنا ہے تیسری سپیشل ٹرین 3 جون دن 11 بجے کراچی کینٹ سے لاہور کے لئے ، چوتھی سپیشل 8 جون کو راولپنڈی سے صبح 8 بجے کوئٹہ کے لئے جبکہ پانچویں اسپیشل ٹرین 8 جون کو لاہور سے شام چھ بجے کراچی کینٹ کے لئے روانہ ہو گی۔
ترجمان کے مطابق عید اسپیشل ٹرینوں کی بکنگ کل 29 مئی سے شروع ہوجائے گی اور ٹکٹ آن لائن اور ریزرویشن دفاتر سے حاصل کیے جا سکیں گے۔
مزید پڑھیں: عید کے دن ریلوے میں سفر کرنے والوں کے لیے آدھے ٹکٹ کا اعلان
یاد رہے دو روز قبل ڈی سی او ریلوے نے کہا تھا عید الفطر سے قبل ہی کراچی سے روانہ ہونے والی ٹرینوں کی بکنگ فل ہو گئی، مسافروں نے پہلے ہی ایڈوانس بکنگ کرالی ہے ، عید اسپیشل ٹرینوں کے اعلان کے بعد خصوصی ٹرینوں کی بکنگ ہوگی۔
خیال رہے وفاقی وزیر ریلوے شیخ رشید نے عوام کو خوش خبری سناتے ہوئے عید کے دن ریلوے میں سفر کرنے والوں کے لیے آدھے ٹکٹ کا اعلان کر دیا تھا اور کہا تھا 8 ہزار نوکریاں اور ہمارے پاس 12 لاکھ درخواستیں آئی ہیں۔ کوئی ایک نوکری بھی بغیر میرٹ کے نہیں دی جائے گی۔
