سری نگر: حریت رہنماؤں نے اقوام متحدہ اور عالمی طاقتوں سے مطالبہ کیا ہے کہ وہ مسئلہ کشمیر کے حل کے لیے کوششیں تیز کریں۔
تفصیلات کے مطابق مقبوضہ کشمیر میں کل جماعتی حریت کانفرنس کے چیئرمین سیدعلی گیلانی نے اقوام متحدہ، امریکا، برطانیہ، فرانس، روس اور چین پر زور دیا ہے کہ وہ تنازعہ کشمیر کے حل کیلئے اپنی سیاسی، سفارتی اور اخلاقی کوششوں کو تیز کریں۔
کشمیر میڈیا سروس کے مطابق سیدعلی گیلانی نے سرینگر سے جاری ایک بیان میں عالمی برادری سے کہا کہ وہ مقبوضہ کشمیر میں ظلم و بربریت، بے رحمانہ قتل عام، سیاسی کارکنوں کی نظربندیاں اور انسانی حقوق کی سنگین پامالیاں بند کرانے کیلئے بھارت پر دباﺅ بڑھائیں۔
حریت چیئرمین نے تنازعہ کشمیر کو برصغیر کے تقسیم کے 1947کے فارمولے پر عمل درآمد نہ ہونے کا نتیجہ قرار دیتے ہوئے کشمیریوں کو انکا حق خودارادیت دینے کے ذریعے مسئلہ کشمیر کے جلد حل پر زوردیا۔
کشمیریوں کو ان کے حق خودارادیت کی ضمانت اقوام متحدہ نے فراہم کرر کھی ہے۔ جموںوکشمیر مسلم لیگ کے ایک وفد اظہار ہمدردی کیلئے پلوامہ اور اسلام آباد کے اضلاع میں شہید نوجوانوں کے گھر گیا۔
وفد کی قیادت سینئر پارٹی رہنماء محمد رفیق گنائی کر رہے تھے۔ دوران حراست لاپتہ کشمیریوں کے والدین کی تنظیم اے پی ڈی پی سے وابستہ مرد اور خواتین کی بڑی تعداد نے پیر کو اپنے لاپتہ اہلخانہ کیلئے انصاف کی فراہمی کے مطالبے کے حق میں پرتاپ پارک سرینگر میں احتجاجی دھرنا دیا۔
بھارتی الیکشن کی ناکامی کشمیریوں کی اخلاقی برتری ہے، حریت رہنما
خیال رہے کہ بھارتی فورسز نے پیر کوضلع اسلام آبادکے علاقے اکنگام میں تلاشی اور محاصرے کی کارروئی شروع کرکے گھر گھر تلاشی لی۔ پٹھان کوٹ کی ایک خصوصی عدالت نے ضلع کٹھوعہ میں آٹھ سالہ خانہ بدوش مسلمان بچی آصفہ کی بے حرمتی اور قتل کے مقدمے میں ملوث چھ ملزمان کو مجرم قراردیا ہے۔
خصوصی عدالت نے سرغنہ سنجی رام ،دو پولیس اہلکاروں دیپک کھجوریہ اور سریندر ورما، آنند دتہ، پرویش کمار اور پولیس کے ایک ہیڈ کانسٹیبل تلک راج کو مجرم ٹھہرایا ہے۔ فرقہ پرست گروپوں سے تعلق رکھنے والے ہندوﺅں نے مسلمان خانہ بدوش قبلے سے تعلق رکھنے والی بچی کو گزشتہ سال دس جنوری کو اغوا کرنے کے بعد اسے گاﺅں کے ایک مندر میں بند کررکھا تھا۔
