امریکا میں پہلی بار روبوٹ کے تیار کیے گئے فن پاروں کی نمائش کا آغاز ہوگیا جسے دیکھنے کے لیے لوگوں کی بڑی تعداد نے آرٹ گیلری کا رخ کرلیا۔
ای ڈا نامی یہ روبوٹ اپنے ہاتھ سے کینوس پر اسکیچ اور تصاویر بنانے کی صلاحیت رکھتی ہے اور اب اس کے بنائے گئے فن پاروں کی نمائش کے بعد روبوٹک تاریخ میں اسے پہلی روبوٹ آرٹسٹ کا اعزاز حاصل ہوگیا۔
یہ روبوٹ سامنے کھڑے شخص کا فوری طور پر اسکیچ بھی تیار کر سکتی ہے۔ ای ڈا کی آنکھوں میں لگے کیمرے سامنے کھڑے شخص کو اسکین کرتے ہیں جس کے بعد آرٹیفیشل انٹیلی جنس الگورتھم کی مدد سے ایک مکمل تصویر تیار ہوتی ہے۔
ای ڈا کا اے آئی (آرٹیفیشل انٹیلی جنس) برطانیہ کی آکسفورڈ یونیورسٹی نے تیار کیا ہے۔ اس کے تیار کردہ فن پاروں کو ایک آخری ٹچ انسانی ہاتھوں سے دیا جاتا ہے۔
روبوٹ آرٹسٹ کے تیار کیے گئے 8 اسکیچز، 20 پینٹنگز، 4 مجسمے و دیگر فن پارے امریکا کی برن گیلری میں نمائش کے لیے پیش کیے گئے ہیں۔
