لاہور: وزیرخزانہ پنجاب ہاشم جواں بخت کا کہنا ہے کہ اسکول ایجوکیشن میں جنوبی پنجاب کے لیے 53 اورسپورٹ میں 40 فیصد فنڈ مختص کیے گئے ہیں۔
تفصیلات کے مطابق وزیرخزانہ پنجاب ہاشم جواں بخت نے پوسٹ بجٹ پریس کانفرنس کرتے ہوئے کہا کہ کہ بجٹ میں35 فیصد مجموعی طورپرجنوبی پنجاب کے لیے رکھا گیا، جو فنڈزجنوبی پنجاب کے لیے مختص ہیں کہیں اورنہیں منتقل ہوسکتے۔
انہوں نے کہا کہ اسکول ایجوکیشن میں جنوبی پنجاب کے لیے 53 اورسپورٹ میں 40 فیصد ایلوکیشن رکھی ہے، 9 بڑے نئے اسپتال اور6 نئی یونیورسٹیوں کی تعمیرکا اعلان کیا گیا۔
وزیرخزانہ پنجاب نے کہا کہ نئی زندگی کے نام سے تیزاب گردی کے شکارافراد کی مدد کی جائے گی، تیزاب گردی کے شکارلوگوں کے لیے فری علاج کی سہولت ہوگی، پاکستان میں تیزاب گردی کا شکارلڑکیوں کا مفت علاج کرایا جائے گا۔
ہاشم جواں بخت نے کہا کہ سیف سٹی کا دائرہ ملتان، گوجرانوالہ، ڈی جی خان اورپنڈی تک لے جا رہے ہیں، اوورنج ٹرین کے لیے 8.1 ارب روپے رکھے ہیں۔
واضح رہے کہ صوبہ پنجاب کے نئے مالی سال 20-2019 کے بجٹ کا کل حجم 23 سو ساٹھ ارب روپے رکھا گیا ہے جس میں ترقیاتی منصوبوں کے لیے 350 ارب روپے مختص کیے گئے ہیں۔
