اسلام آباد : مسلم لیگ ن کے صدر شہباز شریف نے کہا پورا زور لگائیں گے کہ عوام دشمن بجٹ منظور نہ ہو، حکومت جان بوجھ کر بجٹ پہ بحث نہیں ہونے دے رہی۔
تفصیلات کے مطابق پاکستان مسلم لیگ ن کی مشترکہ پارلیمانی پارٹی کا اجلاس صدر ن لیگ شہباز شریف کی صدارت میں ہوا، اجلاس میں پارلیمان کےدونوں ایوانوں کی حکمت عملی پر مشاورت کی گئی اور حکومتی بجٹ کا راستہ روکنے کے لئے لائحہ عمل پرغور کیا گیا۔
پارلیمانی پارٹی اجلاس میں بجٹ منظوری روکنے کا فیصلہ کیا گیا اور گزشتہ اجلاس کی صورتحال اورآئندہ کے لائحہ عمل پربات چیت بھی کی گئی۔
پارلیمنٹ ہائوس میں ہونے والے اجلاس سے خطاب میں پاکستان مسلم لیگ ن کے صدر اور قائد حزب اختلاف شہباز شریف کا کہنا تھا کہ یہ عوام دشمن بجٹ ہے ، پورا زور لگائیں گے کہ عوام دشمن بجٹ منظور نہ ہو۔
شہباز شریف کا کہنا تھا پارلیمانی تاریخ میں پہلی دفعہ حکومت خود بجٹ پہ بحث شروع نہیں ہونے دے رہی ، حکومت جان بوجھ کر بجٹ پہ بحث نہیں ہونے دے رہی، میرے بارے میں طرح طرح کی افواہیں پھیلانے کی کوشش کی جاتی رہی۔
اجلاس میں محمد نواز شریف کی صحت یابی کے لئے دعا کی گئی، شہباز شریف بت کہا نوا شریف صاحب سے میری ملاقات ہوئی وہ بہت ہائی میں تھے اور ملکی حالات پہ بہت پریشان ہیں۔
یاد رہے گذشتہ اجلاس میں ڈپٹی اسپیکر کی جانب سے اپوزیشن لیڈر شہباز شریف کو بجٹ پر بحث شروع کرنے کی دعوت دی تھی ، جس کے بعد بحث شروع ہونے سے قبل شہباز شریف مداخلت اور نعروں کے باعث بار بار اپنی تقریر روک دیتے، ڈپٹی اسپیکر کی جانب سے مائیک کھولنے کے باوجود آدھے گھنٹے تک وہ تقریر شروع نہیں کرسکے تھے۔
بعد ازاں حکومتی اور اپوزیشن ارکان کے احتجاج اور ہنگامہ آرائی کے باعث قومی اسمبلی کا بجٹ اجلاس پیت تک ملتوی کردیا گیا تھا۔
