کراچی: شہر قائد کے پارک میں بلند جھولے نے لوگوں کی زندگیاں خطرے میں ڈال دیں، جھولا بلندی پر خراب ہوگیا، شہری دو گھنٹے تک پھنسے رہے۔
تفصیلات کے مطابق کراچی کے چنکی منکی پارک میں جھولا بلندی پر جاکر خراب ہوگیا، جھولا رکنے پر اس میں بیٹھے افراد دو گھنٹے تک پھنسے رہے، شہریوں کی جانب سے 15 پر پولیس کو کال کی گئی وہ بھی مدد کو نہ پہنچے۔
شہریوں کی جانب سے واقعے کی ویڈیو سوشل میڈیا پر شیئر کی گئیں جو وائرل ہوگئیں۔
نمائندہ اے آر وائی نیوز کامل عارف کے مطابق جھولا بلندی پر پھنس جانے کے بعد پارک انتظامیہ نے فوری طور پر گیٹ بند کردئیے اور لوگوں کو پیچھے ہٹانے کی کوشش کرتے ہوئے ویڈیو بنانے سے روکتے رہے۔
پارک میں جھولے میں پھنسے لوگوں کو ریسکیو کرنے کے لیے کوئی متبادل انتظام موجود نہیں تھا، دو سیڑھیوں کو رسیوں سے جوڑ کر لوگوں کو ریسکیو کیا گیا۔
مزید پڑھیں: پرانی سبزی منڈی کے پارک میں جھولا گر گیا، ایک بچی جاں بحق، متعدد زخمی
جھولا خراب ہونے کا واقعہ گزشتہ رات پیش آیا، شہریوں کی جانب سے مدد کے لیے 15 پر کال کی گئی پولیس بھی مدد کو نہ پہنچی، واقعے کا تاحال کوئی نوٹس نہیں لیا گیا ہے۔
واضح رہے کہ گزشتہ سال جولائی میں پرانی سبزی منڈی پر تفریحی پارک میں جھولا گر گیا تھا جس کے نتیجے میں دس سالہ بچی جاں بحق اور 18 سے زائد افراد زخمی ہوگئے تھے۔
حادثے کے بعد انتظامیہ اور عملہ غائب ہوگیا تھا، ابتدائی طور پر لوگوں نے اپنی مدد آپ کے تحت جھولے کے نیچے دبنے والوں کو نکالا اور ذاتی گاڑیوں کے ذریعے مختلف اسپتالوں میں منتقل کیا تھا۔
