کراچی: قومی کرکٹ ٹیم کے سابق کپتان شاہد خان آفریدی نے کہا ہے کہ ٹیم کی کامیابی کے لیے آفریدی کی کارکردگی بہت ضروری ہے۔
تفصیلات کے مطابق لیڈز میں کھیلے جانے والے میچ میں شاہین آفریدی نے ایک بار پھر عمدہ باؤلنگ کرتے ہوئے چار وکٹیں حاصل کیں، قومی ٹیم کے باؤلرز نے افغانستان کو مختصر ہدف تک محدود رکھا۔
یاد رہے کہ شاہین آفریدی نے نیوزی لینڈ کے خلاف میچ میں بھی شاندار کارکردگی کا مظاہرہ کرتے ہوئے تین اہم وکٹیں حاصل کی تھیں۔
قومی کرکٹ ٹیم کے سابق کپتان نے نوجوان باؤلر کی کارکردگی کو سراہنے کے لیے سماجی رابطے کی ویب سائٹ پر پیغام شیئر کی۔ اُن کا کہنا تھا کہ شاہین آفریدی کی ماضی، موجودہ اور مستقبل میں کارکردگی ٹیم کی فتح کے لیے لازم ہے۔
انہوں نے کہا کہ ’’شاہین آفریدی نے شاندار باؤلنگ کی ، اب اُن بلے بازوں کے لیے نادر موقع ہے کہ جو ابھی تک ایونٹ میں پرفارم نہ کرسکے وہ اچھی بیٹنگ کر کے ٹیم کو فتح دلوائیں‘‘۔
Afridi’s performance was, is and will remain imperative for the success of the team 😊. Well bowled @iShaheenAfridi & the bowling unit. It’s a good opportunity for batsmen who haven’t performed as well recently to regain their form this match #CWC19 #PAKVAFG #WeHaveWeWill
— Shahid Afridi (@SAfridiOfficial) June 29, 2019
یاد رہے کہ پاکستانی ٹیم لیڈز اسٹیڈیم میں افغانستان کے خلاف اپنا اہم میچ کھیل رہی ہے، قومی ٹیم کے باؤلرز نے شاندار کارکردگی کا مظاہرہ کیا جس کی وجہ سے افغان ٹیم 227 رنز تک مختصر رہی۔
شاہین آفریدی نے گلبدین نائب، حشمت اللہ شاہدی، راشد خان، نجیب اللہ زادران کی وکٹیں حاصل کیں جبکہ عماد وسیم اور وہاب ریاض نے دو دو اور شاداب نے ایک کھلاڑی کو پویلین روانہ کیا۔
