سری نگر: مقبوضہ کشمیر کے علاقے سری نگر میں مسافر بس کھائی میں جا گری جس کے نتیجے میں 35 افراد ہلاک اور 17 افراد زخمی ہوگئے
تفصیلات کے مطابق مقبوضہ کشمیر کے ضلع کشتوار میں مسافر بس حادثے کا شکار ہوگئی جس کے نتیجے میں 35 افراد جان کی بازی ہار گئے جبکہ 17 افراد زخمی ہوگئے۔
پولیس حکام کے مطابق بس میں گنجائش سے زیادہ مسافر سوار تھے جس کے باعث حادثہ پیش آیا۔ پولیس نے بس حادثے میں 35 افراد کے ہلاک ہونے کی تصدیق کردی۔
حادثے میں زخمی ہونے والے افراد کو اسپتال منتقل کردیا گیا جہاں انہیں طبی امداد دی جا رہی ہے۔
خیال رہے کہ گزشتہ ہفتے بھی سری نگر کے ضلع شوپیاں میں پکنک پر جانے والے طالب علموں کی گاڑی کھائی میں گرنے سے 11 طالب علم ہلاک ہوگئے تھے۔
بھارتی ریاست ہماچل پردیش میں مسافر بس کھائی میں جاگری، 25 افراد ہلاک
اس سے قبل رواں ماہ 20 جون کو بھارتی ریاست ہماچل پردیش میں مسافر بس کھائی میں گرنے سے 25 افراد ہلاک اور 35 زخمی ہوگئے تھے۔
واضح رہے کہ مقبوضہ کشمیر میں سڑکوں کی خراب صورت حال کے باعث ہر سال ہزاروں افراد جان سے ہاتھ دھو بیٹھتے ہیں۔
