اسلام آباد: عالمی ادارہ صحت (ڈبلیو ایچ او) نے پاکستان کو لشمینیا بیماری سے نمٹنے کی دوائیں فراہم کردیں۔
تفصیلات کے مطابق وزارت قومی صحت میں لشمینیا بیماری کی ادویات حوالگی کی تقریب منعقد ہوئی، عالمی ادارہ صحت پاکستان کے سربراہ اور وزیراعظم کے معاون خصوصی برائے صحت ڈاکٹر ظفر مرزا نے تقریب میں شرکت کی۔
ظفر مرزا نے کہا کہ عالمی ادارہ صحت نے لشمینیا کے 30 ہزار انجکشن فراہم کیے ہیں، لشمینیا سینڈ فلائی نامی مکھی سے لاحق ہونے والی بیماری ہے، سینڈ فلائی نامی مکھی نمی والی جگہوں پر ٹھکانہ بناتی ہے۔
ڈاکٹر ظفر مرزا نے کہا کہ لشمینیا بیماری پھیلانے والی مکھی صبح و شام حملہ آور ہوتی ہے، بیماری انسانی جلد و اندرونی اعضا کو متاثر کرتی ہے۔
مزید پڑھیں: لشمینیا بیماری ہے، اس کا علاج دوا سے ہوتا ہے، دم درود سے نہیں
انہوں نے کہا کہ کھلی فضا میں رہنے والے افراد لشمینیا کا باآسانی شکار بنتے ہیں، عالمی ادارہ صحت پاکستان کو لشمینیا کی مزید 35 ہزار خوراکیں فراہم کرے گا۔ لشمینیا کی ادویات فراہمی پر ڈبلیو ایچ او کے شکر گزار ہیں۔
واضح رہے کہ گزشتہ ماہ ڈاکٹر ظفر مرزا کا کہنا تھا کہ حکومت لشمینیا بیماری کی روک تھام کے لیے اقدامات کررہی ہے، خیبرپختونخوا، بلوچستان اور پنجاب کے بعض علاقے لشمینیا سے متاثر ہیں۔
یاد رہے کہ خیبر پختون خواہ کا علاقہ جنوبی وزیرستان ان دنوں لشمینیا نامی بیماری کی زد میں ہے۔
