صنعا: یمن میں فوج اور حوثی باغیوں کے درمیان تازہ جھڑپوں کے نتیجے میں 42 سے زائد شدت پسند ہلاک ہوچکے ہیں۔
تفصیلات کے مطابق یمن کے دو مختلف علاقوں میں فورسز اور حوثی باغیوں کے درمیان جھڑپیں ہوئیں، مشرقی صوبے مارب کے مغرب میں صراوح کے محاذ پر یمنی فوج کے ہاتھوں 20 حوثی مارے گئے۔
غیرملکی خبررساں ادارے کے مطابق مسلح افواج کے میڈیا سینٹر نے بتایا ہے کہ یمنی فوج نے گھات لگا کر کارروائی کی، کارروائی میں متعدد حوثی باغی زخمی بھی ہوئے۔
ادھر الجوف صوبے کے مغربی ضلع المتون میں یمنی فوج کے ساتھ جھڑپوں میں حوثی ملیشیا کے 22 ارکان ہلاک اور متعدد زخمی ہوگئے۔
یمنی فوج کے ایک کمانڈر کے مطابق باغی حوثی القعیطہ کا ٹیلہ واپس لینے کی کوشش کر رہے تھے تاہم یمنی فوج نے یہ کوشش ناکام بنا دی۔
دریں اثنا یمن کی سرکاری فوج کا کہنا ہے کہ یمن کے مارب شہر میں حوثی باغیوں کے 2 ڈرون طیارے بھی مار گرائے ہیں، جبکہ بھرپور مقابلے کے بعد حوثی پیچھے ہٹنے پر مجبور ہوگئے۔
یمن کے شہر مارب میں حوثی باغیوں کے 2 ڈرون طیارے گر کر تباہ
ادھر حال ہی میں امریکی وزیرخارجہ مائیک پومپیو نے اقوام متحدہ کے خصوصی مندوب برائے یمن مارٹن گریفتھس سے ملاقات کی ہے، اس دوران یمن کی تازہ صورت حال پر تبادلہ خیال کیا گیا تھا۔
مارٹن گریفتھس یمن میں قیام امن کے لیے بھرپور اقدامات کررہے ہیں، انہوں نے گذشتہ دنوں متحدہ عرب امارات کا بھی دورہ کیا تھا اور یمنی تنازع پر تفصیلی تبادلہ خیال بھی کیا تھا۔
