اسلام آباد : وزیراعظم عمران خان پچاس لاکھ گھروں کی تعمیر سے متعلق آج رجسٹریشن کا آغاز کریں گے، ہر خاندان سے ایک ہی فرد کی رجسٹریشن قبول کی جائے گی ، رجسٹریشن فارم نادرا کی ویب سائٹ سے ڈاؤن لوڈ کیا جاسکتا ہے۔
تفصیلات کے مطابق وزیراعظم عمران خان پچاس لاکھ گھروں کی تعمیر کے منصوبے سے متعلق آج ملک بھر میں رجسٹریشن کے عمل کا آغاز کریں گے، رجسٹریشن فارم نادرا کی ویب سائٹ سے ڈاون لوڈ کیا جاسکتا ہے۔
رجسٹریشن فارم نادرا ای سہولت فرنچائز سے بھی حاصل کیا جاسکتا ہے، ہر خاندان سے ایک ہی فرد کی رجسٹریشن قبول کی جائے گی رجسٹریشن کا عمل تین ماہ تک جاری رہےگا۔
یاد رہے حکومت نے نیا پاکستان ہاؤسنگ پروگرام کے تحت لاہور ، کراچی ، اسلام آباد ،راولپنڈی، ملتان ، فیصل آباد، جہلم، کوئٹہ اور پشاور سمیت ملک کے دیگر شہروں میں رجسٹریشن کا جلد آغاز کا اعلان کیا تھا۔
نیا پاکستان ہاؤسنگ پروگرام کے تحت متوسط طبقے کو انتہائی آسان اقساط پر گھردیئے جائیں گے، ہاوسنگ اسکیمز میں اسکول، مساجد، کمیونٹی سینٹر ، اور میڈیکل سینٹرز کی سہولت بھی دستیاب ہو گی۔
مزید پڑھیں : نیاپاکستان ہاؤسنگ پروگرام: کراچی لاہور،اسلام آباد میں رجسٹریشن جلد شروع کرنے کا اعلان
گھروں کی مرحلہ وار تعمیر کے ساتھ ساتھ چالیس سے زائد تعمیراتی صنعتوں کو فروغ ملے گا، جہاں ساٹھ لاکھ سے زیادہ ہنر افراد کو روزگار کے مواقع فراہم ہوں گے وہیں رئیل اسٹیٹ کی مد ملکی معیشت میں کھربوں روپے اضافہ ہو گا جبکہ اوورسیز پاکستانیوں کے لئے دس فیصد کوٹہ ہوگا۔
واضح رہے وزیر اعظم عمران خان نے گزشتہ سال اکتوبر میں وزیراعظم نے ” نیا پاکستان ہاؤسنگ منصوبے” کا افتتاح کیا تھا ، جس کے تحت پانچ برسوں میں 50 لاکھ گھر بنانے کا فیصلہ کیا گیا تھا۔
تقریب سے خطاب میں وزیراعظم نے کہا تھا کہ ہاؤسنگ اسکیم ملک میں خوشحالی لے کرآئے گی، اپنا گھراسکیم ان لوگوں کیلئے جو کبھی گھر بنانے کا سوچ نہیں سکتے تھے، گھروں کے منصوبے میں عام آدمی ہمارا ٹارگٹ ہوگا۔
