کراچی : سول ایوی ایشن اتھارٹی نے ملک بھر کے تمام ایئرپورٹس پر پلاسٹک ریپنگ کی قیمت میں کمی کرکے پچاس روپے مقرر کردی، نئے نرخ کا اطلاق آج سے ہوگا۔
تفصیلات کے مطابق وفاقی وزیر برائے ہوابازی غلام سرور خان کے نوٹس لینے پر سول ایوی ایشن اتھارٹی نے ملک بھر کے تمام ایئرپورٹس پر پلاسٹک ریپنگ کی قیمت میں کمی کردی ہے۔
اس حوالے سے سیکریٹری ایوی ایشن شاہ رخ نصرت نے مسافروں کو سہولت فراہم کرنے کیلئے قیمت کم کرنے کا اعلان کیا ہے جس کے مطابق اسلام آباد ، لاہور اور کراچی سمیت ملک بھر کے دیگر بڑے ایئرپورٹس پر پلاسٹک ریپنگ کیلئے پچاس روپے مقرر کردیے گئے۔
ایئرپورٹس پر اس سے قبل ڈبل ریپنگ کے نرخ 400 اور سنگل کے نرخ 200 روپے وصول کیے جاتے تھے۔ ترجمان سول ایوی ایشن اتھارٹی کا کہنا ہے کہ نئے نرخ وصولی کے حوالے سے تمام ایئرپورٹس پر احکامات جاری کردیئے گئے ہیں، آج سے ہی ریپنگ کے50 روپے وصول کیے جائیں گے۔
مزید پڑھیں: بیرون ملک جانے والےمسافروں کے سامان کو پلاسٹک ریپنگ کرانا لازمی قرار
واضح رہے کہ سول ایوی ایشن ڈویژن نے بیرون ملک جانے والے مسافروں کے سامان کو پلاسٹک ریپنگ کرانا لازمی قرار دیتے ہوئے ایئرپورٹس پر سامان کی ریپنگ کیلئے مزید مشینیں لگانے کی ہدایت کرچکی ہے۔ ذرائع کا کہنا ہے بغیر پلاسٹک ریپنگ کے سفری بیگ لے جانے کی اجازت نہیں ہوگی۔
