واشنگٹن: امریکی صدر ڈونلڈ ٹرمپ نے کہا ہے کہ وہ انتظامیہ سے انٹرنیٹ سرچ انجن گوگل کے خلاف تحقیقات کروانا چاہتے ہیں کہ گوگل چینی حکومت کے ساتھ کام کررہا ہے یا نہیں۔
تفصیلات کے مطابق امریکی صدر ڈونلڈ ٹرمپ نے سماجی رابطے کی ویب سائٹ ٹویٹر پر اپنے پیغام میں کہا ہے کہ ٹیکنالوجی میں سرمایہ کاری کرنے والے پیٹر تھائیل کا ماننا ہے کہ گوگل کے خلاف غداری کی تحقیقات ہونی چاہئے۔
امریکی صدر نے کہا کہ یہ بات ایک عظیم اور بہترین شخص نے کہی ہے، جو ٹیکنالوجی کو کسی سے بھی زیادہ بہتر طریقے سے جانتے ہیں، انتظامیہ اس معاملے کی تحقیقات کرائے گی۔
دوسری جانب گوگل نے الزامات کو بے بنیاد قرار دیتے ہوئے تحقیقات سے متعلق پیٹر تھائیل کے مقاصد پر سوال اٹھایا جو ایک طویل عرصے سے ڈونلڈ ٹرمپ کے حامی ہیں۔
“Billionaire Tech Investor Peter Thiel believes Google should be investigated for treason. He accuses Google of working with the Chinese Government.” @foxandfriends A great and brilliant guy who knows this subject better than anyone! The Trump Administration will take a look!
— Donald J. Trump (@realDonaldTrump) July 16, 2019
گوگل نے غیرملکی خبررساں ادارے کو دئیے گئے بیان میں کہا کہ ہم پہلے بھی کہہ چکے ہیں ہم چینی فوج کے ساتھ کام نہیں کرتے۔
واضح رہے کہ 2010 میں چین کی جانب سے سرچ کے نتائج کو سینسر کرنے کی کوششوں کی وجہ سے گوگل نے چین سے سرچ انجن کا خاتمہ کردیا تھا۔
مزید پڑھیں: امریکی صدر کی گوگل، فیس بک اور ٹویٹر کو مقدمے کی دھمکی
گوگل چین میں اپنا کاروبار محدود کرچکا ہے لیکن رواں سال جاری کی گئی ایک رپورٹ میں کہا گیا ہے کہ اس کے ایک سائنس دان نے ایک تحقیقی منصوبے میں شرکت کی تھی جس میں شہری اور ملٹری دونوں ایپلی کیشنز موجود ہوسکتی ہیں۔
یاد رہے کہ امریکی صدر ڈونلڈ ٹرمپ مختلف مواقع پر گوگل پر تنقید کرتے رہے ہیں اور انہوں نے گوگل کو خود سمیت اپنے حامیوں کے خلاف تعصب پسندی کا الزام بھی عائد کیا تھا۔
