کراچی: نیب کی جانب سے سابق مشیر خزانہ مفتاح اسماعیل کی گرفتاری کے لئے کراچی کے مختلف علاقوں میں چھاپے مارے گئے ہیں۔
تفصیلات کے مطابق سابق وزیر خزانہ کے گھر پر ہونے والی ریڈ کے بعد نیب ٹیم نے شہر کے مختلف علاقوں میں چھاپے مارے۔
نیب ٹیم نے مفتاح کی تلاش میں ان کی سائٹ ایریا فیکٹری اور شارع فیصل کے دفتر پر چھاپا مارا، بعد ازاں کے ڈی اےاسکیم،کلفٹن اورڈیفنس میں ریڈ کی گئی۔
نیب ذرائع کے مطابق ان علاقوں میں مفتاح اسماعیل کی موجودگی کی اطلاعات تھیں۔ البتہ تاحال مفتاح اسماعیل کی گرفتاری میں کامیابی نہیں ملی۔
قبل ازیں نیب نے مفتاح اسماعیل کے گھر پر چھاپا مارا، آج سہ پہر نیب ٹیم مفتاح اسماعیل کے گھر پہنچی۔ کچھ دیر انتظار کرنے کے بعد نیب کی ٹیم گھر میں داخل ہوگئی۔ ٹیم کے ساتھ خواتین اہلکار بھی موجود تھیں.
نیب کی ٹیم سابق وزیر خزانہ مفتاح اسماعیل کو ایل این جی کیس میں گرفتار کرنے آئی تھی۔ ان کی وارنٹ گرفتاری پر چیئرمین نیب نے دستخط کیے تھے۔ تفتیشی ٹیم نے گھر کی تلاشی لی۔
خیال رہے کہ مفتاح اسماعیل اور عمران الحق شیخ کو بھی آج نیب آفس طلب کیا گیا تھا، تاہم وہ بھی پیش نہیں ہوئے۔
بعد ازاں سابق وزیر خزانہ مفتاح اسماعیل اور پاکستان اسٹیٹ آئل (پی ایس او) کے سابق مینجنگ ڈائریکٹر عمران الحق کو بھی گرفتار کرنے کا فیصلہ کیا گیا.
مزید پڑھیں: نیب نے سابق وزیر اعظم شاہد خاقان عباسی کو گرفتار کرلیا
یاد رہے کہ آج سابق وزیر اعظم اور مسلم لیگ ن کے رہنما شاہد خاقان عباسی کو قومی ادارہ احتساب (نیب) نے گرفتار کرلیا، انہیں آج نیب کی جانب سے ایل این جی کیس میں طلب کیا گیا تھا تاہم وہ پیش نہیں ہوئے۔
نیب راولپنڈی اور لاہور کی مشترکہ ٹیم نے سابق وزیر اعظم شاہد خاقان عباسی کو ٹھوکر نیاز بیگ کے قریب ٹول پلازہ پر روک کر گرفتار کرلیا۔
