دبئی: متحدہ عرب امارات کی ریاست راس الخیمہ میں بیوی کو شوہر کے میسج چیک کرنا مہنگا پڑ گیا، عدالت نے تین ہزار درہم جرمانے کی سزا سنادی۔
عرب میڈیا کے مطابق اماراتی ریاست راس الخیمہ کی عدالت میں شوہر کی جانب سے درخواست دائر کی گئی کہ بیوی اس کی پرائیویسی میں دخل اندازی کرتی ہے اور اس کے موبائل کے میسج کو چیک کرتی ہے، جس پر عدالت نے خاتون کو 3 ہزار درہم جرمانہ کی سزا سنادی۔
رپورٹ کے مطابق شوہر کے وکیل کی جانب سے موقف اختیار کیا گیا کہ اہلیہ کو میری ذاتی زندگی میں دخل اندازی کرنے پر آرٹیکل 378 کے تحت سزا سنائی جائے۔
خاتون نے عدالت میں اپنے جرم کا اعتراف کیا لیکن ساتھ ہی شوہر پر الزام عائد کیا کہ اس کے کسی دوسری خاتون کے ساتھ تعلقات ہیں، جس پر وہ موبائل روزانہ چیک کرکے ان کے میسج پڑھا کرتی تھیں۔
مزید پڑھیں: ابوظبی، واٹس ایپ پر بیوی کی بے عزتی کرنے والے شوہر کو 2 ماہ قید کی سزا
خاتون کے وکیل کا کہنا تھا کہ وہ شوہر کے ساتھ 9 سال سے ازدواجی زندگی گزار رہی ہیں لیکن شوہر کی جانب سے چیٹنگ کی گئی جس پر انہوں نے موبائل فون پر میسج چیک کرنا شروع کیے۔
خاتون کے وکیل کا مزید کہنا تھا کہ شوہر کی جانب سے دوسری خاتون کو مختلف قسم ایموجیز بھیجے جاتے تھے اور اس سے محبت کا اظہاربھی کیا تھا۔
عدالت نے شوہر اور بیوی دونوں کے موقف سننے کے بعد خاتون کو قصور وار ٹھہراتے ہوئے ان پر تین ہزار درہم جرمانہ عائد کردیا اور انہیں وکیل کی فیس کے 100 درہم بھی ادا کرنا ہوں گے۔
