کراچی: شہر قائد میں اسٹریٹ کرائم کی واردات کی لپیٹ میں ایم کیو ایم رکن اسمبلی بھی آگئے، ڈاکو گن پوائٹ پر موبائل، نقدی لوٹ کر باآسانی فرار ہوگئے۔
تفصیلات کے مطابق کراچی کے علاقے اورنگی ٹاؤن نمبر پانچ میں مسلح ملزمان ایم کیو ایم کے رکن صوبائی اسمبلی علی خورشیدی سے گن پوائنٹ پر موبائل، نقدی، دستاویزات لوٹ کر فرار ہوگئے۔
ایم کیو ایم پاکستان کے رکن اسمبلی علی خورشیدی کے مطابق مسلح ملزمان موٹر سائیکل پر سوار تھے۔
واضح رہے کہ دو روز قبل ایم کیو ایم پاکستان کے کنوینر اور وفاقی وزیر برائے انفارمیشن ٹیکنالوجی خالد مقبول صدیقی کی نئی ڈبل گیبن گاڑی ایم کیو ایم کے مرکز بہادر آباد سے چوری ہوگئی تھی۔
مزید پڑھیں: وفاقی وزیر خالد مقبول صدیقی کی گاڑی ایم کیو ایم پاکستان کے مرکز سے چوری
خالد مقبول صدیقی کی گاڑی بہادر آباد مرکز کے باہر کھڑی تھی یہ گاڑی ایم کیو ایم پاکستان کی فلاحی تنظیم خدمت خلق فاؤنڈیشن کے نام پر رجسٹرڈ ہے اور اسے کچھ عرصے قبل ہی خریدا گیا تھا۔
پولیس کی جانب سے بہادر آباد مرکز کے باہر لگے کیمروں کی فوٹیج حاصل کرتے ہوئے گاڑی کی تلاش شروع کردی گئی ہے اور واقعے کا مقدمہ نیوٹاؤن تھانے میں درج کرلیا گیا تھا۔
خیال رہے کہ کراچی میں چوری اور ڈکیتی کی وارداتوں میں اضافہ ہوا ہے، عید یا کوئی تہوار قریب آتے ہی ان وارداتوں میں اضافہ ہوجاتا ہے اور پولیس اسٹریٹ کرائم اور چوری کی وارداتوں میں قابو پانے میں ناکام نظر آتی ہے۔
