کراچی : سول ایوی ایشن اتھارٹی نے شہریوں سے اپیل کی ہے کہ عیدالاضحٰی کے ایام میں قربانی کے بعد جانوروں کی آلائشیں ایئر پورٹ کے اطراف نہ پھینکیں تاکہ پرندوں کی وجہ سے جہازوں کو کسی قسم کا نقصان نہ ہو۔
تفصیلات کے مطابق عید قرباں کے موقع پر پرندوں سے ہوائی جہازوں کو محفوظ بنانے کیلئے سول ایوی ایشن نے احتیاطی تدابیر اختیار کرلیں، سول ایوی ایشن اتھارٹی اور پاک فضائیہ نے ملک بھر کے ائیر بیس اور ایئرپورٹس پر آگاہی مہم شروع کردی۔
اس حوالے سے سی اے اے حکام نے شیریوں سے اپیل کی ہے کہ عید الاضحیٰ پر شہری ذمہ داری کا ثبوت دیں اور جانوروں کی آلائشیں صرف مقرر کردہ جگہوں پر ہی پھینکیں تاکہ گندگی کی وجہ سے وہاں آنے والے پرندوں کی وجہ سے جہازوں کو نقصان نہ پہنچے اور فضائی سفر محفوظ رہے۔
ملک بھر کے تمام ایئرپورٹس منیجر کی جانب سے صفائی ستھرائی کے حوالے سے اداروں کو اقدامات کرنے کی ہدایت جاری کردی ہے۔
سول ایوی ایشن اتھارٹی کی جانب سے ضلعی انتظامیہ، بلدیاتی ادارے اور اعلیٰ حکام کو خط لکھ دیا گیا ہے جس میں کہا گیا ہے کہ عید الاضحی کے موقع پر قربانی کے جانوروں کی باقیات کو ٹھکانے لگانے کیلئے اقدامات کئے جائیں۔
آلائشوں کے پڑے رہنے کی وجہ سے پرندوں کی آمد میں اضافہ ہوجاتا ہے جس کی وجہ سے جہازوں کیلئے خطرہ جود رہتا ہے۔
سی اے اے حکام کا کہنا ہے کہ مختلف ایئرپورٹس اور پاک فضائیہ کے ایئربیسز کے اطراف بلدیاتی ادارے صفائی ستھرائی کو یقینی بنائیں۔
تمام بلدیاتی ادارے عید الاضحی پر آلائشوں کو ٹھکانے لگانے کیلئے خصوصی اقدامات کریں، عیدا لاضحی پر قربانی کے جانوروں کی آلائشوں کو مخصوص جگہ پر ٹھکانے لگائے جائیں، قومی اثاثوں کی حفاظت اور فضائی سفر کو محفوظ بنانے کیلئے تمام شہریوں کو اپنا مؤثر کردار ادا کرنا ہوگا۔
