پاکستان نے مقبوضہ کشمیر پر سلامتی کونسل کا اجلاس بلانے کی درخواست کردی
اسلام آباد: پاکستان نے مقبوضہ کشمیر کی صورت حال پرسیکیورٹی کونسل سے رابطہ کرلیا۔
پاکستان وزیر خارجہ شاہ محمود قریشی کے مطابق پاکستان نے سیکیورٹی کونسل کا ہنگامی اجلاس بلانے کا مطالبہ کیا ہے۔
شاہ محمود قریشی کا کہنا تھا کہ آج انھوں نے سیکیورٹی کونسل کے صدر کوخط لکھا تھا، جو انھیں موصول ہو چکا ہے، یکم اور 6اگست کو لکھے گئے خطوط بھی ریکارڈ کا حصہ ہیں۔
وزیرخارجہ نے کہا کہ مقبوضہ کشمیر کی صورتحال پر بھارت کوبھی باور کرانا چاہتا ہوں کہ آپ کی جارحیت پر پاکستان کا خاموش رہنا آپ کی غلط فہمی ہے، پاکستان اپنے دفاع میں ہر حد تک جاسکتا ہے۔
مزید پڑھیں: کشمیری مظالم پر پردہ ڈالنے کے لیے بھارت کی ایل او سی پر خودساختہ جھڑپ کی منصوبہ بندی
شاہ محمود قریشی نے کہا کہ بھارت کو اس کا اندازہ 27 فروری کے عملی مظاہرے سے ہو چکا ہے، انشا اللہ کل 14 اگست کو وزیر اعظم عمران خان مظفرآباد جا رہے ہیں، وزیر اعظم پاکستان کامؤقف آزاد کشمیر نمائندوں کے سامنے رکھیں گے، کل پورے پاکستان میں کشمیریوں سےاظہار یکجہتی کامظاہرہ ہوگا۔
15 اگست کو پورے پاکستان میں یوم سیاہ ہو گا، دنیادیکھےگی، ہردار الخلافہ سے ان اقدامات کے خلاف آوازاٹھےگی، کشمیریوں کو پیغام دیناچاہتا ہوں کہ آپ تنہا نہیں، ہم آپ کے ساتھ ہیں۔
