لاہور: امیر جماعت اسلامی سراج الحق نے کہا ہے کہ خطے میں پائیدار امن کی چابی مسئلہ کشمیر کا حل ہے۔
تفصیلات کے مطابق امیر جماعت اسلامی سینیٹر سراج الحق نے کہا ہے کہ مودی کی جنونیت کی وجہ سے خطہ شعلوں کی نذر ہوسکتاہے، عالمی برادری کو مودی کے پاگل پن کا نوٹس لینا چاہئے۔
امیر جماعت اسلامی نے کہا کہ مسئلہ کشمیر پر مذاکرات کا تیسرا اور اہم ترین فریق کمشیری ہیں، کشمیریوں کو اعتماد میں لیے بغیر مسئلہ کشمیر کا حل قابل قبول نہیں ہوگا۔
سینیٹر سراج الحق نے کہا کہ آج دنیا بھر میں بھارت کا یوم آزادی یوم سیاہ کے طور پر منایا جارہا ہے، اقلیتوں کے لیے عذاب بھارتی جمہوریت کا نقاب اترچکا ہے۔
مزید پڑھیں: ہزاروں کشمیریوں کا پاکستانی پرچم تھامے مارچ کرنا بھارت کے لئے نوشتہ دیوارہے: سراج الحق
امیر جماعت اسلامی سراج الحق نے کہا کہ امن پسند قوموں کو مظلوم کشمیریوں کے ساتھ کھڑا ہونا چاہئے۔
واضح رہے کہ چند روز قبل سراج الحق کا کہنا تھا کہ ہزاروں کشمیریوں کا پاکستانی پرچم تھامے مارچ بھارت کے لیے نوشتہ دیوار ہے، ہم پاکستانی قوم، عالمی برادری کو متحرک کرنے کی کوشش کررہے ہیں۔
ان کا کہنا تھا کہ کشمیر پاکستان کی شہ رگ ہے، بھارتی عمل قابل مذمت ہے، آج پاکستان کی شہ رگ پر بھارت قابض ہے۔
