کھٹمنڈو: سیف گیمز 2019 میں سے پاکستان کے قومی کھیل ہاکی کو نکال دیا گیا ہے ، اس کا سبب نیپال میں ہاکی اسٹیڈیم کا تیار نہ ہونا ہے۔
تفصیلات کے مطابق سیف گیمز کا 13 واں ایڈیشن یکم تا دس دسمبر نیپال کے شہر کھٹمنڈو اور پوکھارا میں ہونا ہے ، نیپالی حکومت ڈیڈ لائن ختم ہونے تک ہاکی اسٹیڈیم تیار کرنے میں ناکا م رہی ہے۔
اس موقع پرپاکستان اولمپک ایسوسی ایشن نے ایشین اولمپکس کمیٹی سے درخواست کی ہے کہ ساؤتھ ایشین گیمز میں ہاکی کو بہر صورت شامل کیا جائے۔
اس صورتحال پر پاکستان اولمپک ایسوسی ایشن کے خالد محمود کا کہنا تھا کہنا ہے کہ پاکستان اور بھارت دونوں ہی سیف گیمز میں سے ہاکی نکالے جانے پر نالاں ہیں۔
ان کا کہنا تھا اس حوالے ہونے والی تمام تر قیاس آرائیاں فضول ہیں اور ہاکی کو نکالے جانے کا واحدسبب نیپال میں اس کے لیے اسٹیڈیم نا ہونا ہے۔
پاکستان ہاکی فیڈریشن کے سیکرٹری آصف باجوہ کا کہنا ہے کہ کہ یہ حالات ہمارے دائرہ اختیار سے باہر ہیں اورایسو سی ایشن تمام معاملات کو دیکھ رہی ہے۔امید ہے کہ ایشین اولمکپس کمیٹی کی جانب سے اچھی خبر ملے گی۔
یاد رہے کہ سیف گیمز کا انعقاد گزشتہ برس مارچ میں نیپال میں ہونا تھا ، تاہم نیپال کی حکومت کا کہنا تھا کہ سنہ 2015 کے تباہ کن زلزلے نے انفرااسٹرکچر کو شدید نقصان پہنچایا ہے، سیف گیمز کی جانب سے بار بار تاریخ میں توسیع کی جاتی رہی پر تاحال نیپال میں تمام تر انتظامات مکمل نہیں ہوسکے ہیں۔
