اسلام آباد: قومی ادارہ احتساب (نیب) کے چیئرمین جسٹس (ر) جاوید اقبال کا کہنا تھا کہ کرپٹ عناصر کے خلاف احتساب کے لیے تمام وسائل بروئے کار لا رہے ہیں، احتساب سب کے لیےکی پالیسی پر عمل کرتے رہیں گے۔
تفصیلات کے مطابق قومی ادارہ احتساب (نیب) کے چیئرمین جسٹس (ر) جاوید اقبال کا کہنا تھا کہ نیب ہر قسم کی بدعنوانی کے خاتمے کے لیے پرعزم ہے، احتساب سب کے لیے کی پالیسی پر عمل کرتے رہیں گے۔
جاوید اقبال کا کہنا تھا کہ کرپٹ عناصر کے خلاف احتساب کے لیے تمام وسائل بروئے کار لا رہے ہیں، نیب نے آگاہی تدارک اور انفورسمنٹ پر مشتمل پالیسی اختیار کی ہے۔
انہوں نے کہا کہ پالیسی کے مثبت نتائج سامنے آئے ہیں، نیب نے قیام سے اب تک 326 ارب روپے ریکور کیے ہیں۔ سنہ 2018 میں نیب نے 30 ارب ریکور کیے، گزشتہ 19 ماہ میں نیب نے ریکارڈ کامیابیاں حاصل کی ہیں۔
چیئرمین نیب کا کہنا تھا کہ نیب نے عدالتوں میں 12 سو 49 بدعنوانی کے مقدمات دائر کیے، نیب کو موصولہ شکایات کی تعداد میں اضافہ نیب پر اعتماد کا اظہار ہے۔
اس سے قبل ایک اجلاس کی صدارت کرتے ہوئے چیئرمین نیب کا کہنا تھا کہ اگر آپ لوگ محنت کریں گے، تو وہ وقت ضرور آئے گا جب ملک کی باگ ڈور نوجوانوں کے ہاتھ میں ہوگی۔
انہوں نے کہا تھا کہ حکمرانی میں ریاست مدینہ کا تصور خوش آئند ہے، دعا ہے کہ یہ نظام آئے، کامیاب ہو اور ملک ترقی کرے۔
