لاہور : احتساب عدالت نے آمدن سے زائداثاثہ جات اورمنی لانڈرنگ کیس میں اپوزیشن لیڈر پنجاب اسمبلی حمزہ شہباز کے جسمانی ریمانڈ میں 14 دن کی توسیع کردی اور ملزم کو4 ستمبر کو پیش کرنے کا حکم دیا۔
تفصیلات کے مطابق لاہور کی احتساب عدالت میں اپوزیشن لیڈر پنجاب اسمبلی حمزہ شہباز کیخلاف آمدن سے زائداثاثہ جات اورمنی لانڈرنگ کیس کی سماعت ہوئی ، احتساب عدالت کے جج نعیم ارشد نے سماعت کی۔
حمزہ شہباز کو جسمانی ریمانڈ مکمل ہونے پر عدالت میں پیش کیا گیا ، نیب حکام نے تحقیقات کے لئےمزید ریمانڈ کی استدعا کرتے ہوئے بتایاوعدہ معاف گواہ شاہد رفیق حمزہ شہباز کے لیے منی لانڈرنگ میں کرتارہا۔سوئس بینک ٹرانزیکشن کی بھی تفصیلات منگوائی گئی ہے۔
عدالت نےپوچھاجب بیرون ملک سےپیسہ آئےتوشناختی کارڈ لیے جاتے ہیں، تب کیسے منی لانڈرنگ ہوئی؟عدالتی استفسار پر نیب حکام نے منی لانڈرنگ کے طریقہ کار کا کچا چٹھا کھول دیا۔
نیب حکام نے بتایا رانا ظہیر نامی بندے نے سلمان شہباز کو ایک کروڑروپے بھجوائے، عدالت نے سوال کیا رانا ظہیر نامی بندے کوشناخت کر لیا ہے کہ نہیں؟
نیب وکیل نے جواب دیااسکی شناخت ہو گئی ہے اس نے لندن سے حمزہ شہبازکے اکاؤنٹ میں ٹی ٹی کی، فاضل جج نے نیب کے دلائل پرحمزہ شہبازسے پوچھاآپ کچھ کہنا چاہتے ہیں،تواُن کےپاس صفائی میں کہنے کو کچھ نہیں تھا۔ اور وہ الٹا جج سے ہی سوال کرنے لگے مجھے بتائیں میں نے کرپشن کی ہے؟میرا دامن توصاف ہے۔
عدالت نے فریقین کو سُننے کے بعد حمزہ شہباز کے جسمانی ریمانڈ میں 14 دن کی توسیع کرتے ہوئے ملزم کو4 ستمبر کو پیش کرنے کا حکم دیا۔
دوسری جانب عدالت نےآشیانہ اقبال ریفرنس میں شہباز شریف کوطلب کررکھاہے، شہباز شریف کےکمر درد کے باعث عدالت میں پیش نہ ہونے کا امکان ہے۔
رمضان شوگر ملز کیس: حمزہ شہباز کے جوڈیشل ریمانڈ میں 21 اگست تک توسیع
یاد رہے کہ گذشتہ سماعت میں نیب پراسیکیوٹر نے دلائل دیتے ہوئے کہا کہ حمزہ شہباز سے مزید تفتیش کی ضروت ہے، بہت سے معاملات میں ابھی تک تفتیش مکمل نہیں ہوئی، حمزہ شہبازسے اکاونٹس اورٹرانزیکشن کی تفتیش کرنی ہے، جس کے بعد عدالت نے 21 اگست تک حمزہ شہباز کے ریمانڈ میں توسیع کردی تھی۔
