لاہور : وزیراعلیٰ پنجاب عثمان بزدار نے یوم عاشورپرسخت حفاظتی اقدامات اور جلوسوں کی سیکیورٹی کیلئے 4 درجاتی حصار بنانے کی ہدایت کرتے ہوئے کہا مذہبی ہم آہنگی کومزید فروغ دینے کیلئے ہر ممکن اقدامات کئے جائیں۔
تفصیلات کے مطابق وزیراعلیٰ پنجاب عثمان بزدارکی زیرصدارت یوم عاشورہ کی سیکیورٹی سے متعلق اجلاس ہوا ، جس میں وزیراعلیٰ پنجاب نے یوم عاشور پر سخت حفاظتی اقدامات کی ہدایت کردی۔
پنجاب میں 2 لاکھ 32 ہزارپولیس افسر واہلکار جبکہ 1 لاکھ 38ہزار رضاکار ڈیوٹی دیں گے ، صوبہ بھر میں 623 مقامات کو حساس قرار،سکیورٹی کو الرٹ کر دیا گیا ہے، پنجاب میں محرم کے دوران 9118 جلوس،26 ہزار مجالس منعقد ہوں گی۔
عثمان بزدار نے کہا امن و امان کیلئےسیکیورٹی کےفول پروف انتظامات کویقینی بنایاجائے، مجالس اور جلوسوں کے لئے روٹ اوروقت کی پابندی یقینی بنائی جائے۔
وزیراعلیٰ کی جلوسوں کی سیکیورٹی کے لئے 4 درجاتی حصار بنانے کی ہدایت کرتے ہوئے کہا قابل اعتراض مواد کی اشاعت وتقسیم پر کوئی سمجھوتہ نہیں ہوگا، خلاف ورزی پر بلاامتیاز کارروائی کی جائے۔
عثمان بزدار نے اشتعال انگیز تقاریرکرنے والوں کےخلاف سخت کارروائی کا حکم دیتے ہوئے کہا ضابطہ اخلاق کی پابندی پرعملدرآمدہرصورت یقینی بنایا جائے، مذہبی ہم آہنگی کومزید فروغ دینے کیلئے ہر ممکن اقدامات کئے جائیں۔
ان کا کہنا تھا کہ مساجد،امام بارگاہوں اہم مقامات پراضافی نفری تعینات کی جائے، قانون نافذ کرنے والےادارےآپس میں قریبی رابطہ رکھیں، جلوسوں کے پرامن منتشر ہونے تک اہلکاروں کو موجود رہنا چاہیے۔
خیال رہے ملک بھر میں محرم الحرام بڑے عقیدت و احترام کے ساتھ منایا جا رہا ہے، شہر کے مختلف مقامات سے شھداء کربلا کی یاد میں ماتمی جلوس نکالے جا رہے ہیں مختلف امام بارگاہ میں مجلس منعقد کیے جا رہے ہیں۔
قانون نافذ کرنے والے اداروں کی جانب سے محرم الحرام کے موقع پر ملک بھر میں سیکورٹی کے سخت انتظامات کئے گئے ہیں، محرم الحرام کی مجالس اور جلوسوں میں کسی بھی دہشت گردی کےخطرے سے نمٹنے کے لئے فول پروف انتظامات کئے گئے ہیں۔
حکومت نے 9 اور 10 محرم کو عام تعطیل کا اعلان کردیا ہے۔
