کراچی: مشیر سندھ حکومت مرتضیٰ وہاب کا کہنا ہے کہ تمام اسپتالوں کے نظام کی جانچ پڑتال کریں گے، ہر اسپتال میں فضلے کو ٹھکانے لگانے کے طریقہ کار کو جانچا جائے گا۔
تفصیلات کے مطابق مشیر سندھ حکومت مرتضیٰ وہاب کا کہنا ہے کہ ماحولیاتی آلودگی ختم کرنے کے لیے قوانین موجود ہیں، قوانین پر عملدر آمد اور جذبے کی ضرورت ہے۔
مرتضیٰ وہاب کا کہنا تھا کہ فیصلہ ہوا ہے تمام اسپتالوں کے نظام کی جانچ پڑتال کریں گے، ہر اسپتال میں فضلے کو ٹھکانے لگانے کے طریقہ کار کو جانچا جائے گا۔ صنعتی فضلے کو مروجہ طریقہ کار کے تحت ٹھکانے لگانا ہوگا۔
انہوں نے کہا کہ صنعتکاروں سے بھی درخواست ہے ماحولیاتی قوانین پر عمل کریں۔
خیال رہے کہ چند روز قبل کراچی کے ساحل پر استعمال شدہ سرنجیں پائی گئی تھیں جس سے ایڈز اور ہیپاٹائٹس پھیلنے کا خدشہ پیدا ہوگیا۔
بعد ازاں اسپتال کے فضلے کی خبر پر ایکشن لیتے ہوئے ساحل کی صفائی کروائی گئی، ڈپٹی کمشنر ساؤتھ کا کہنا تھا کہ فضلہ کسی لیب یا اسپتال کا لگتا ہے۔ بظاہر ایسا معلوم ہوتا ہے کہ طبی فضلہ سمندر سے بہہ کر ساحل پر آیا ہے۔
بعد ازاں مرتضیٰ وہاب نے کہا تھا کہ اسپتالوں سے پوچھا جائے گا کہ وہ طبی فضلہ کہاں پھینکتے ہیں، وفاقی حکومت کو بھی چاہیئے کے اس مسئلے پر اپنا کردار ادا کرے۔
