اسلام آباد: دفتر خارجہ کے ترجمان ڈاکٹر فیصل نے کہا ہے کہ افغان صدارتی انتخابات کے پیش نظر پاک افغان بارڈر پر سیکیورٹی سخت رہے گی۔
ریڈیو پاکستان کی رپورٹ کے مطابق ڈاکٹر فیصل کا کہنا تھا کہ 26 ستمبر سے 29 ستمبر تک سیکیورٹی کے سخت اقدامات کیے جائیں گے اور پیدل جانے والے تمام راستوں کی سخت نگرانی کی ہوگی۔ اُن کا کہنا تھا کہ تجارت کے لیے چلنے والی گاڑیوں کی سخت نگرانی اور چیکنگ کی جائے گی۔
ڈاکٹر فیصل کے مطابق 27 اور 28 ستمبر کو ایمرجنسی مریضوں کے علاوہ تمام مسافروں کے لیے راستے بند رہیں گے۔
خیال رہے افغانستان میں ہفتے کو صدارتی انتخابات ہورہے ہیں ، جس میں اٹھارہ امیدوارمیدان میں ہیں تاہم موجودہ صدراشرف غنی اورافغان چیف ایگزیکٹو عبداللہ عبداللہ کے درمیان سخت مقابلے کی توقع ہے۔
حزب اسلامی کے سربراہ گلبدین حکمت یاربھی صدارتی الیکشن لڑرہے ہیں۔
افغان الیکشن کمیشن کا کہنا ہے کہ صدارتی انتخابات کے لئے ملک بھرمیں پانچ ہزارپولنگ اسٹیشنز بنائے گئے ہیں ، الیکشن کے سیکیورٹی کے غیرمعمولی اقدامات کئے گئے ہیں جبکہ پولنگ اسٹیشنز پر باہتر ہزار سیکیورٹی اہلکار تعینات کئے جائیں گے۔
یہ بھی یاد رہے افغانستان میں صدارتی مہم کے دوران پرتشدد واقعات میں متعددافراد ہلاک ہوچکے ہیں۔
