کراچی: چیئرمین پی سی بی احسان مانی نے کہا ہے کہ سری لنکا سے سیریز سے پاکستان میں مزید ٹیموں کی آمد کا سلسلہ شروع ہوگا، یہ سیریز پاکستان کے لیے بہت اہم ہے۔
تفصیلات کے مطابق چیئرمین پاکستان کرکٹ بورڈ احسان مانی کراچی میں پریس کانفرنس کر رہے تھے، انھوں نے کہا سری لنکن بورڈ کے تعاون سے یہ سیریز ممکن ہوئی ہے۔
چیئرمین کا کہنا تھا دہشت گردی کے واقعات تو نیوزی لینڈ میں بھی ہو چکے ہیں، مقصد سیکورٹی کے فول پروف انتظامات کرنا ہوتے ہیں، سری لنکن بورڈ کی سیکورٹی ٹیم پہلے ہی انتظامات سے مطمئن ہے۔
احسان مانی نے کہا سری لنکا سے سیریز پاکستان کے لیے اہمیت کا حامل ہے، مزید ٹیمیں بھی پاکستان آنے لگیں گی۔
تازہ ترین: دوسرا ون ڈے، بابر اعظم کی سنچری، سری لنکا کو جیت کے لیے 306 رنز کا ہدف
خیال رہے کہ کراچی کے نیشنل اسٹیڈیم میں پاکستان اور سری لنکا کے درمیان تین ون ڈے میچز پر مشتمل سیریز کھیلی جا رہی ہے، جس کا دوسرا میچ آج کھیلا جا رہا ہے۔ پہلا میچ جو 27 ستمبر کو نیشنل اسٹیڈیم میں کھیلا جانا تھا، شہر قائد میں بارش کی وجہ سے منسوخ کر دیا گیا تھا۔
نیشنل اسٹیڈیم میں کھیلے جانے والے دوسرے ایک روزہ میچ میں بابر اعظم کی شان دار سنچری کی بہ دولت پاکستان نے سری لنکا کو جیت کے لیے 306 رنز کا ہدف دے دیا ہے۔
واضح رہے کہ دونوں ٹیموں کے درمیان ون ڈے سیریز کا تیسرا اور آخری میچ 2 اکتوبر کو کھیلا جائے گا۔
