لاہور: وزیراعلیٰ پنجاب عثمان بزدار نے پاکستان کڈنی اینڈلیور ٹرانسپلانٹ انسٹیٹیوٹ میں نئے ڈائلیسز یونٹ کا افتتاح کردیا ، ان کا کہنا تھا کہ شعبہ صحت میں بہتری لانے کے لیے پرعزم ہیں۔
تفصیلات کے مطابق وزیراعلیٰ پنجاب نے پی کے ایل آئی میں ڈائلیسز یونٹ 2 کاافتتاح کیا ہے ، یونٹ 2 کو 36 ڈائلیسز مشینیں فراہم کی گئی ہیں۔
اس موقع پروزیراعلیٰ پنجاب نے ڈائلیسز یونٹ کا دورہ بھی کیا اور مریضوں کی عیادت کی۔عثمان بزدار نےمریضوں سےعلاج کی سہولتو ں سےمتعلق استفسار کیا جس پر مریضوں نے اسپتال میں فراہم کی جانیوالی طبی سہولتوں کی فراہمی پراطمینان کا اظہار کیا۔
اس دوران وزیر اعلیٰ پنجاب عثمان بزدار کا کہنا تھا کہ انسٹیٹیوٹ میں گردے،جگر کےمریضوں کے لیے معیاری طبی سہولتیں ہیں،اسپتال کی عمارت کو رواں سال کے آخر تک مکمل کرلیا جائے گا اور مزید 6 آپریشن تھیٹرز وسط اکتوبر تک فنکشنل ہو جائیں گے۔
ان کاکہنا تھا کہ انسٹیٹیوٹ میں رواں سال3لیور،31 کڈنی ٹرانسپلانٹ کئے گئے ،اسپتال کےدیگر3فلورمکمل ہونےسے475بستروں کااضافہ ہوگا، انہوں نے مزید کہا کہ شعبہ صحت میں مزید بہتری لانے کے لیے پرعزم ہیں۔
وزیراعلیٰ پنجاب نے اس موقع پر پنجاب انفراسٹرکچر ڈیولپمنٹ اتھارٹی کو اسپتال کاکام رفتارتیز سے کرنے کی ہدایت کرتے ہوئے کہا کہ شعبہ صحت کو بہتر بنانے کیلئے وسائل کی کمی نہیں آنے دیں گے۔
