اسلام آباد: سابق صدر آصف زرداری کو جیل سے اسپتال منتقل کرنے کے لئے احتساب عدالت میں درخواست دائر کر دی ، جس میں کہا گیا ہے کہ آصف زرداری کی جان کو خطرہ ہے ، جیل میں طبی سہولیات ملنا آصف زرداری کا حق ہے۔
تفصیلات کے مطابق آصف زرداری کے وکیل سردار لطیف کھوسہ نے سابق صدر کو جیل سے اسپتال منتقل کرنے کے لئے احتساب عدالت میں درخواست دائر کر دی ، لطیف کھوسہ نے دلائل دیتے ہوئے کہا کہ آصف زرداری کی جان کو خطرہ ہے۔ جیل میں طبی سہولیات ملنا آصف زرداری کا حق ہے۔
وکیل نے کہا زرداری اس حکومت سے کچھ بھی نہیں لینا چاہتے لیکن جو قانونی حق ہے وہ دیا جائے۔ ہم نے ضیا الحق سے بھی معافی نہیں مانگی تھی، عدالتی ریلیف ہمارا حق ہے۔
ان کا کہنا تھا کہ زرداری صاحب کو دل کی تکلیف ہوئی تو یہ لوگ اسپتال نہیں پہنچا سکیں گے، اڈیالہ جیل سے اسپتال تک ڈیڑھ گھنٹہ لگ جاتا ہے، میڈیکل بورڈ نے طبی سہولیات کے لئے زرداری کو پمز منتقل کرنے کا کہا، یہ لوگ ایک دن پمز لیکر گئے دوسرے دن واپس جیل لے گئے۔
لطیف کھوسہ نے کہا جب تک زرداری جیل میں ذاتی اٹینڈینٹ ساتھ رکھنے کی اجازت بھی دیں۔ ہمارے لوگ جیل کے باہر اپنا خیمہ لگا لیں گے ، صرف صبح اور شام اندر جا کر چیک کریں گے۔ عدالت نے دلائل سننے کے بعد درخواست پر فیصلہ محفوظ کر لیا۔
مزید پڑھیں : میڈیکل بورڈ کی آصف زرداری کو جیل میں اے سی فراہم کرنے کی سفارش
یاد رہے احتساب عدالت نے جعلی اکاؤنٹس کیس میں سابق صدر آصف علی زرداری کو ایئرکنڈیشنر کی سہولت کی فراہمی طبی ماہرین کی رائے سے مشروط کردی تھی ، بعد ازاں میڈیکل بورڈ نے سابق صدر آصف زرداری کو جیل میں اے سی فراہم کرنےکی سفارش کی تھی۔
دو ماہ قبل آصف زرادی کو طبیعت ناسازی پر دو روز کے لیے پمز ہسپتال میں داخل کیا گیا تھا، وہ دل، مہروں، شوگر اور دیگر امراض میں مبتلا ہیں۔
