کراچی : جوڑیا بازار میں نامعلوم افراد نے بھتہ نہ دینے پر تاجر کی دکان کو نذر آتش کردیا، ملزمان نے تاجر سے پانچ لاکھ روپے بھتہ مانگا تھا، کورنگی میں عوام کے تشدد سے ایک ڈاکو ہلاک اور دوسرا زخمی ہوگیا۔
تفصیلات کے مطابق کراچی کے علاقے جوڑیا بازار میں بھتہ نہ دینے کی پاداش میں مسلح افراد نے دکان کو آگ لگادی۔
اس حوالے سے دکاندار نے پولیس کو بیان دیا ہے کہ موٹرسائیکل سوار بھتہ خوروں نے دکان کو آگ لگائی، دکاندار نے بتایا کہ ملزمان نے مجھ سے5لاکھ روپے بھتہ مانگا تھا اور بھتہ نہ دینے پر مٹی کا تیل چھڑک کر دکان کو آگ لگائی گئی۔
دوسری جانب کراچی کے علاقے کورنگی نمبر چار پر دو مبینہ ڈاکو عوام کے ہتھے چڑھ گئے، مشتعل شہریوں نے ڈاکوؤں کو پکڑ کر شدید تشدد کا نشانہ بنایا۔
علاقہ مکینوں کے تشدد سے ایک ڈاکو موقع پر ہلاک جبکہ دوسرازخمی ہوگیا، ایس ایچ او کورنگی کا کہنا ہے کہ زخمی ڈاکو کو طبی امداد کیلئے جناح اسپتال منتقل کردیا گیا ہے۔
پولیس کے مطابق تشدد سے ہلاک ہونے والے ڈاکو کی شناخت اویس اور زخمی کی نعمان کے نام سے ہوئی ہے۔ کورنگی پولیس نے واقعے کا مقدمہ درج کرکے مزید تفتیش کا آغاز کردیا ہے۔
