اسلام آباد: پاکستان تحریک انصاف کے سینئر رہنما جہانگیر ترین نے ایک بار پھر وزیر اعظم عمران خان کے استعفے کا سوال مسترد کر دیا۔
تفصیلات کے مطابق جہانگیر ترین سے ایک صحافی نے سوال کیا کہ کیا وزیر اعظم عمران خان مستعفی ہوں گے، انھوں نے جواب دیتے ہوئے کہا کہ وزیر اعظم کے استعفیٰ دینے کا سوال ہی پیدا نہیں ہوتا۔
پی ٹی آئی رہنما نے کہا کہ وزیر اعظم کے استعفے کی بات کہیں ہوئی اور نہ ہوگی، حکومت آزادی مارچ سے پریشان نہیں، مولانا کا یہ جمہوری حق ہے۔
یہ بھی پڑھیں: یقین سے نہیں کہہ سکتے کہ عمران خان استعفیٰ دیں گے، مولانا فضل الرحمان
خیال رہے کہ وزیر اعظم عمران خان بھی اپوزیشن پر واضح کر چکے ہیں کہ وہ احتجاجی جلسے یا مارچ کرنا چاہیں تو کریں لیکن استعفیٰ نہیں دیں گے، استعفے کا سوال ہی نہیں پیدا ہوتا۔ ادھر مولانا فضل الرحمان نے کل کہا تھا کہ وہ یقین سے نہیں کہہ سکتے کہ عمران خان استعفیٰ دیں گے، اس سے قبل بلاول بھٹو دعویٰ کر چکے ہیں کہ وزیر اعظم استعفے دینے والے ہیں۔
مولانا فضل الرحمان کا آزادی مارچ آج شہر اقتدار میں داخل ہوگا، ایچ نائن سیکٹر میں سو ایکڑ کے میدان پر تیاریاں بھی آخری مراحل میں ہیں۔
آزادی مارچ اس وقت پنجاب میں رواں دواں ہے، حکومت کی جانب سے ریڈ زون میں داخلے کی کوشش پر طاقت کا استعمال کیا جا سکتا ہے، پولیس کے اضافی دستے تیار رکھنے کی بھی ہدایت جاری کی جا چکی ہے۔
