لاہور : پنجاب حکومت نے صوبے میں ماحولیاتی آلودگی اور سموگ پر قابو پانے کے لیے مہم کو مزید تیز کرنے کا فیصلہ کر لیا ہے۔
اس سلسلے میں وزیراعلیٰ پنجاب سردار عثمان بزدار سے وزیراعظم کے مشیرموسمیاتی تغیرات ملک امین اسلم نے ملاقات کی۔
اس موقع پر گفتگو کرتے ہوئے وزیراعلیٰ پنجاب نے کہا کہ ماحولیاتی آلودگی اور سموگ پر قابو پانے کے لیے مہم تیز کرنے کیلئے پنجاب گرین ڈویلپمنٹ پروگرام کا آغاز کردیا گیا ہے۔
اس پروگرام کے حوالے سے عالمی بینک کے تعاون کے شکر گزار ہیں،273ملین ڈالر کا پروگرام صوبے میں گرین انوسٹمنٹ کے فروغ کیلئے اہم ہوگا۔
عثمان بزدار نے کہا کہ پنجاب میں اسٹیل ملز کو جدید ٹیکنالوجی پر منتقل کیا جارہا ہے، اس کے علاوہ اینٹوں کے بھٹوں کو بھی زگ زیگ ٹیکنالوجی پر منتقل کیا جارہا ہے۔
ان کا مزید کہنا تھا کہ پنجاب میں فصلوں کی باقیات جلانے پر پابندی بھی لگادی گئی ہے، اسموگ کے حوالے سے پنجاب میں ائیر کوالٹی مانیٹرکرنے کیلئے6مانیٹرنگ اسٹیشن قائم کیے گئے ہیں۔
مزید پڑھیں: لاہور میں اسموگ کے تدارک کیلئے کام کررہے ہیں، ملک امین اسلم
انہوں نے بتایا کہ ماحولیاتی آلودگی کو کنٹرول کرنے کیلئے محکمہ ماحولیات کے زیرانتظام30نئے ائیر کوالٹی مانیٹرنگ اسٹیشن قائم کریں گے۔
