اسلام آباد : وزیر مملکت علی محمد خان نے کہا ہے کہ آزادی مارچ والوں کو وزیراعظم عمران خان کا استعفیٰ کسی صورت نہیں ملے گا، ہم نے مارچ والوں کو پورے پاکستان میں کہیں نہیں روکا۔
یہ بات انہوں نے اے آر وائی نیوز کے پروگرام الیونتھ آور میں گفتگو کرتے ہوئے کیا، انہوں نے کہا کہ وزیراعلیٰ کے پی مولانا فضل الرحمان کے آزادی مارچ کو روک سکتے تھے لیکن انہوں نے نہیں روکا۔
انہوں نے کہا کہ ہمارے وزیراعلیٰ پنجاب بھی جے یو آئی ف کا مارچ روک سکتے تھے لیکن انہوں بھی ایسا کچھ نہیں کیا، وزیراعظم عمران خان نے سب کو ہدایت دی تھی کہ مارچ والوں کو آنے دیں۔
علی محمدخان نے پوچھا کہ2014کے دھرنے میں وزیراعلیٰ کے پی کے ساتھ کیا ہوا تھا؟ یا شہباز شریف دور میں وزیراعلیٰ کے قافلے کے ساتھ کیا ہوا تھا؟ ان کا کہنا تھا کہ کچھ بھی ہوجائے وزیراعظم کا استعفیٰ کسی صورت نہیں ملے گا۔
Rain, thunder storms, cold-wave hits islamabad tonight. The poor people at the dharna suffering while their leadership enjoys the comfort of their cozy homes.
Sad state of affairs!— Ali Haider Zaidi (@AliHZaidiPTI) November 5, 2019
علاوہ ازیں وفاقی وزیر علی زیدی نے اسلام آباد میں ہونے والی بارش سے مارچ کے شرکاء کی مشکلات کے حوالے سے ٹوئٹر پیغام میں کہا ہے کہ اسلام آباد میں طوفانی بارش کے بعد دھرنے کے شرکاء کا خیال آرہا ہے۔
انہوں نے کہا کہ تیز بارش کی وجہ سے دھرنے میں شریک لوگ مشکلات سے دوچار ہیں، بےچارے دھرنے والے مصیبت میں ہے اور ان کی قیادت آرام سے گھروں میں بیٹھی ہے، یہ دھرنے والوں کیلئے انتہائی افسوسناک صورتحال ہے۔
