کراچی: پاکستان کی فلمی دنیا سے تعلق رکھنے والے اداکار جوڑے سعود اور جویریہ سعود کے گھر پر قرآن خوانی کا اہتمام کیا گیا۔
تفصیلات کے مطابق تین روز قبل یعنی پانچ نومبر کو جویریہ سعود کے والد کی برسی تھی، اس ضمن میں انہوں نے اپنے گھر میں قرآن خوانی کی محفل کا انعقاد کیا۔
اداکارہ نے قرآن خوانی میں شرکت کے لیے اپنے بہن بھائیوں اور دیگر رشتے داروں کو دعوت دی۔ محفل کے دوران گھر میں باجماعت نماز کی ادائیگی بھی کی گئی جس کی تصاویر سوشل میڈیا پر وائرل ہوئیں۔
یاد رہے کہ جویریہ اور سعود مذہبی خاندان سے تعلق رکھتے ہیں، اداکار سعود نامور ثنا خواں قاری وحید ظفر قاسمی کے بھانجے ہیں جبکہ شوبز انڈسٹری میں آنے سے قبل اداکارہ بھی تلاوت اور نعت مختلف مقابلوں میں حصہ لے چکی ہیں۔ گزشتہ دنوں جویریہ نے یوٹیوب پر اپنا چینل بنایا اور انہوں نے اپنے عالیشان گھر کے مختلف حصوں کی ویڈیو دو پارٹ میں کر کے شیئر کی۔
یاد رہے کہ جویریہ اور سعود 2005 میں ازدواجی بندھن میں بندھے تھے جس کے بعد اُن کے ہاں 2007 میں بیٹی جنت اور 2011 میں بیٹے ابراہیم کی پیدائش ہوئی۔ اداکار جوڑا اپنا اپنا پروڈکشن ہاؤس چلا رہا ہے۔
