لاہور: پاکستان کرکٹ بورڈ (پی سی بی) نے ٹی ٹین لیگ پر پالیسی بیان جاری کردیا جس کے مطابق کوئی موجودہ یا سابق کھلاڑی این او سی کے بغیر لیگ کھیلنے نہیں جاسکے گا۔
تفصیلات کے مطابق ٹی ٹین لیگ کے حوالے سے پی سی بی کا کہنا ہے کہ رواں برس سب کھلاڑیوں کے لیے یکساں پالیسی ہے اس میں کوئی تبدیلی نہیں کی گئی ہے کوئی کھلاڑی این او سی کے بغیر لیگ میں شرکت نہیں کرے گا۔
کرکٹ بورڈ کا کہنا ہے کہ لیگ کھیلنے کے لیے موجودہ اور ریٹائرڈ کھلاڑیوں کو آئی سی سی قوانین کے مطابق این او سی لازمی درکار ہوتی ہے۔
پی سی بی کا کہنا ہے کہ ٹی 10 لیگ کے اس سیزن کے لیے کسی کرکٹر کو این او سی نہیں دیں گے۔
مزید پڑھیں: پی سی بی کا بڑا فیصلہ، ٹی ٹین لیگ کے لیے پاکستانی کھلاڑیوں کی این او سی منسوخ
واضح رہے کہ گزشتہ ماہ پی سی بی نے قومی کرکٹ ٹیم کے کھلاڑیوں کو ٹی ٹین لیگ میں شرکت کے لیے دی گئی این اوسیز منسوخ کردی تھیں۔
پی سی بی کا کہنا تھا کہ این او سیز منسوخ کرنے کا فیصلہ کھلاڑیوں اور ڈومیسٹک کرکٹ کے وسیع تر مفاد کے لیے کیا گیا ہے، کھلاڑیوں کے مصروف شیڈول کے باعث این او سی منسوخ کی گئیں۔
یاد رہے کہ ٹی 10 لیگ میں پاکستان کے 15 سے 16 کھلاڑیوں نے حصہ لینا تھا۔
خیال رہے کہ ٹی ٹین لیگ میں زیادہ شیئرز بھارتیوں کے ہیں، ٹی ٹین لیگ حالیہ دنوں میں میچ فکسنگ سے متعلق شدید متنازع ہوچکی ہے۔
