لاہور : مسلح افراد نے لاہور کے انارکلی بازار میں بھارت سے آنے والی سکھ خواتین کو لوٹ لیا، ڈولفن اسکواڈ نے ملزمان کو پکڑ کر مسروقہ سامان برآمد کرلیا۔
تفصیلات کے مطابق لاہور کے علاقے انارکلی بازار میں بھارت سے بابا گرونانک کے جنم دن پر پاکستان آنے والی سکھ خواتین یاتریوں سے لوٹ مار کی کوشش ناکام ہوگئی۔
دو مسلح افراد نے دن دہاڑے سکھ خواتین یاتریوں سے ان کے پرس اور طلائی زیورات چھینے اور موقع سے فرار ہوگئے۔
خواتین کی چیخ وپکار پر وہاں قریب ہی سکھ یاتریوں کی حفاظت پر مامور ڈولفن اسکواڈ کے اہلکاروں نے ملزمان کا تعاقب کرکے پکڑ لیا۔
اہلکاروں نے دونوں ملزمان کے قبضے سے چھینے گئے زیورات اور پرس برآمد کرکے خواتین یاتریوں کے حوالے کردیا۔
اس موقع پر سکھ خواتین نے مسرت کا اظہار کرتے ہوئے ڈولفن اہلکاروں کا شکریہ ادا کیا۔ ان کا کہنا تھا کہ پاکستان پرامن ملک ہے، یہاں آکر تحفظ کا بھرپور احساس ہوتا ہے۔
