اسلام آباد: پاکستان کے پروفیشنل باکسر محمد وسیم میکسیکو کے گینگان لویز کو پچھاڑنے کے لیے تیار ہیں۔
تفصیلات کے مطابق پاکستانی باکسر محمد وسیم حریف ریسلر کو پچھاڑنے کے لیے بے چین ہیں، ایم ٹی گلوبل نے فائٹ کی تیاریاں شروع کردیں، محمد وسیم المعروف فالکن کے لیے منفرد طرز کا باکسنگ ٹرنکس تیار کرلیا گیا۔
ٹرنکس میں قمتی سوار وسکی ہیرے اور سانپ کی کھال سے فالکن لکھا گیا ہے، محمد وسیم کل اسکاٹ لینڈ سے دبئی کے لیے روانہ ہوں گے۔
محمد وسیم اور میکسیکو کے گینگان لوپز کا ٹکراؤ 22 نومبر کو ہوگا، گینگان لوپز 46 باؤٹس میں سے 36 میں کامیاب رہے اور 10 میں ناکامی کا سامنا کرنا پڑا۔
باکسر محمد وسیم کے حریف تین مرتبہ ڈبلیو بی سی لائٹ فلائی ویٹ کے عالمی چیمپئن رہ چکے ہیں۔
مزید پڑھیں: دبئی، پاکستانی باکسر محمد وسیم نے پروفیشنل باؤٹ جیت لی
باکسر محمد وسیم نے کہا کہ میکسیکن فائٹر تجربے میں مجھ سے آگے ہیں، میری اس مقابلے کے لیے تیاری مکمل ہے، گینگان لوپز کو ہرا کر پاکستان کا نام روشن کروں گا۔
واضح رہے کہ 14 ستمبر کو باکسر محمد وسیم نے دبئی میں منعقدہ پروفیشنل باؤٹ جیتی تھی، محمد وسیم نے فلپائنی باکسر کو پہلے ہی راؤنڈ میں ناک آؤٹ کردیا تھا۔
یاد رہے کہ محمد وسیم ایک سال بعد رنگ میں دوبارہ اترے تھے، جیت سے ان کی رینکنگ میں بہتری آئے گی۔
خیال رہے کہ دبئی میں پروفیشنل باؤٹ جیتنے پر وزیراعلیٰ بلوچستان جام کمال نے باکسر محمد وسیم کے لیے پانچ لاکھ روپے انعام کا اعلان کیا تھا۔
