دبئی: پاکستان کے پروفیشنل باکسر محمد وسیم اسکاٹ لینڈ میں بھرپور ٹریننگ کے بعد شیڈول فائٹ کے لیے آج دبئی روانہ ہوں گے۔
تفصیلات کے مطابق عالمی چیمپئن میکسیکن باکسر گینگن کو پچھاڑنے کے لیے پاکستان کے باصلاحیت باکسر محمد وسیم آج اسکاٹ لینڈ سے دبئی روانہ ہوں گے، فالکن کے نام سےمشہور وسیم کے لیے منفرد طرز کا باکسنگ ٹرنکس بنایا گیا ہے۔
ٹرنکس میں قیمتی ہیرے لگے ہیں اور فالکن لکھا ہے، محمد وسیم 22 نومبر کو تین مرتبہ کے عالمی چیمپئن میکسیکن باکسر گینگن سے مقابلہ کریں گے، پاکستانی باکسر پاکستان کے لیے لگاتار 8 فائٹس جیت چکے ہیں۔
محمد وسیم اور میکسیکو کے گینگن لوپز کا ٹکراؤ 22 نومبر کو ہوگا، گینگن لوپز 46 باؤٹس میں سے 36 میں کامیاب رہے اور 10 میں ناکامی کا سامنا کرنا پڑا۔ باکسر محمد وسیم کے حریف تین مرتبہ ڈبلیو بی سی لائٹ فلائی ویٹ کے عالمی چیمپئن رہ چکے ہیں۔
گزشتہ روز باکسر محمد وسیم کا کہنا تھا کہ میکسیکن فائٹر تجربے میں مجھ سے آگے ہیں، میری اس مقابلے کے لیے تیاری مکمل ہے، گینگن لوپز کو ہرا کر پاکستان کا نام روشن کروں گا۔
واضح رہے کہ 14 ستمبر کو باکسر محمد وسیم نے دبئی میں منعقدہ پروفیشنل باؤٹ جیتی تھی، محمد وسیم نے فلپائنی باکسر کو پہلے ہی راؤنڈ میں ناک آؤٹ کردیا تھا۔
