کراچی: محکمہ بلدیات سندھ نے ”آوارہ کتوں کے خلاف جنگ” نامی منصوبہ تیار کرلیا، صوبے میں آوارہ کتوں کو پکڑنے کے لیے ٹریننگ کا آغاز کیا جائے گا۔

تفصیلات کے مطابق محکمہ بلدیات سندھ نے آوارہ کتوں کو ٹھکانے لگانے کا منصوبہ تیار کیا ہے جس کے تحت بلدیاتی کونسلز کے عملے کو آوارہ کتوں کو پکڑنے اور نس بندی کی ٹریننگ دی جائے گی، آوارہ کتوں کے خلاف اس منصوبے کا پی سی ون منظوری کے لیے محکمہ منصوبہ بندی کو ارسال کردیا گیا۔

آوارہ کتوں کے خلاف مجوزہ منصوبے میں این جی اوز بھی مالی وفنی تعاون کریں گے۔ سیکریٹری بلدیات کا کہنا ہے کہ سندھ آوارہ کتوں کے خلاف جامع منصوبے کا آغاز کر رہا ہے، آوارہ کتوں کی نسل روکنے کے لیے دنیا میں رائج طریقہ اپنایا جائے گا۔

ادھر سندھ حکومت نے کتوں کو ویکسین دینے کا فیصلہ کرلیا، آئندہ ہفتے سے سندھ کے ڈویژنل ہیڈکوارٹرز میں کتوں کی ویکسی نیشن شروع ہوگی، کراچی کے تمام اضلاع میں آوارہ کتوں کو ویکسین دی جائے گی، آوارہ کتوں کے لیے این جی او نے سندھ حکومت کو مفت ویکسین فراہم کردی۔

ویکسی نیشن سے آوارہ کتوں کے کاٹے سے شہری متاثر نہیں ہوسکیں گے، آوارہ کتوں کو پکڑنے والے اسٹاف کی بھی ویکسی نیشن کی جائے گی، سندھ میں 5لاکھ آوارہ کتوں کو ویکسین دی جائے گی۔