کراچی: شہر قائد میں سی ٹی ڈی نے کارروائی کرتے ہوئے ایم کیو ایم لندن کے 2 ٹارگٹ کلر کو گرفتار کرلیا۔
تفصیلات کے مطابق کراچی میں سی ٹی ڈی نے 6 افراد کے قتل میں ملوث ایم کیو ایم لندن کے 2 ٹارگٹ کلر کو گرفتار کرلیا، ملزمان لاشوں کو بوری میں ڈال کر شریف آباد پل پر پھینک دیا کرتے تھے۔
ایس ایس پی سی ٹی ڈی غلام سرور ابڑو کا کہنا ہے کہ ملزمان میں اسد اللہ خان عرف انقلابی اور محمد جان عرف جانو شامل ہیں۔
ایس ایس پی کے مطابق ملزمان ایم کیو ایم لندن کے حماد صدیقی کے قریبی ساتھی ہیں، گرفتار افراد نے 6 افراد کو اغوا کرکے قتل کرنے کا اعتراف کیا ہے۔
ادھر عوامی کالونی پولیس نے کارروائی کرتے ہوئے لیاری گینگ وار کا دہشت گرد گرفتار کرلیا، عتیق الرحمان عرف ملا کا تعلق گینگ وار عزیر جان بلوچ گروپ سے ہے۔
مزید پڑھیں: رینجرز، پولیس کی مشترکہ کارروائی، ٹارگٹ کلر شریف کالیا گرفتار
ایس ایس پی فیصل عبداللہ چاچڑ کے مطابق ملزم سے دستی بم، 2 ٹی ٹی پستول برآمد کی گئی ہیں، گرفتار ملزم دہشت گردی، بھتہ خوری سمیت سنگین وارداتوں میں ملوث ہے۔
ایس ایس پی کورنگی کا کہنا ہے کہ گرفتار ملزم نے دوران تفتیش سنسنی خیز انکشافات کیے ہیں، 2017 میں ملزم نے رحمان ڈکیت کے گھر پر دستی بم مارا، ملزم نے بالا لاڈلہ گروپ کے انیس سے 6 لاکھ روپے بھتہ وصول کیا۔
فیصل عبداللہ کا کہنا ہے کہ انیس لاسی محلہ لیاری میں منشیات کا اڈہ چلاتا تھا، ملزم نے کلاکوٹ میں موبائل فرنچائز سے 2 لاکھ روپے بھتہ وصول کیا، ملزم نے دھوبی گھاٹ کوکنگ آئل کمپنی سے ڈھائی لاکھ روپے وصول کیے۔
پولیس کے مطابق ملزم نے کلاکوٹ میں موبائل کمپنی پر بھتہ نہ دینے پر دستی بم سے حملہ کیا، ملزم نے 2017 میں گھاس منڈی میں اسلحہ کے زور پر چار لاکھ روپے لوٹے اور فائرنگ کرکے شہریوں کو بھی زخمی کیا۔
