کراچی : شہر قائد میں ڈینگی وائرس سے متاثرہ 2 افراد جان کی بازی ہار گئے، جس کے بعد رواں سال ڈینگی سے متاثرہ جاں بحق افراد کی تعداد 37 ہوگئی ہے۔
تفصیلات کے مطابق کراچی میں ڈینگی وائرس سے متاثرہ مزید 2 افراد انتقال کرگئے ، 40 سالہ شہزاد کورنگی اور 60 سالہ عبدالرافع شاہ فیصل کا رہائشی تھا، جس کے بعد رواں سال ڈینگی سےمتاثرہ جاں بحق افرادکی تعداد37 تک جا پہنچی ہے۔
رواں سال سندھ میں 14ہزار 317 افراد ڈینگی کا شکار ہوئے جبکہ کراچی میں ڈینگی سے متاثرہ افراد کی تعداد 13 ہزار 330 ہے۔
یاد رہے 2 روز قبل ایک رپورٹ میں بتایا گیا تھا کہ رواں سال ملک میں ڈینگی کے پچاس ہزار پچاس کیسز رپورٹ ہوئے، سب سے زیادہ 13622ڈینگی کیسز سندھ سے رپورٹ ہوئے جبکہ وفاقی دارالحکومت سے رواں برس 13200 کیس سامنےآئے۔
مزید پڑھیں : ملک بھر میں ڈینگی کے 50 ہزار کیسز سامنے آگئے
رپورٹ کے مطابق پنجاب سے 9890، بلوچستان سے 3217 ، خیبرپختونخوا 7021 جبکہ قبائلی اضلاع سے 780 ڈینگی کیسز رپورٹ ہوئے، اسی طرح آزادکشمیر سے رواں برس 1691ڈینگی کیسز کی خبرملی۔
رواں برس ملک میں ڈینگی سے 80اموات ہوچکی ہیں، جس میں 34اموات سندھ میں ہوئیں جبکہ وفاقی دارالحکومت میں ڈینگی سے 22اموات ہوئیں۔
ذرائع کے مطابق 2011 میں22000 ، 2017میں 25000 ڈینگی کیس ریکارڈ ہوئے تھے جبکہ ڈینگی نے پہلی بار2005میں کراچی میں وبائی صورت اختیار کی تھی۔
