لاہور: ٹی ٹوئنٹی کے بعد ٹیسٹ میچ میں بھی پاکستانی ٹیم کو آسٹریلیا کے ہاتھوں شرمناک شکست ہوئی، ہیڈ کوچ مصباح الحق کے چارج سنبھالنے کے بعد قومی ٹیم اب تک ایک میچ بھی نہ جیت سکی۔
تفصیلات کے مطابق مصباح کی کوچنگ میں مسلسل شکستوں کا سلسلہ جاری ہے، ان کے ہیڈکوچ اور چیف سلیکٹر بننے کے بعد بدقسمتی سے ٹیم ایک بھی میچ نہ جیت سکی، سری لنکا کے خلاف ہوم گراؤنڈ میں بھی پاکستان کو شکست کا مزا چکھنا پڑا تھا۔
بعد ازاں آسٹریلیا میں آکر بھی شاہینوں کے لیے فتح کے دروازے بند ہیں، آسٹریلیا کے خلاف ٹی ٹوئنٹی کے بعد ٹیسٹ کا بھی مایوس کن نتیجہ آیا، پہلے ٹیسٹ میچ میں کینگروز کے ہاتھوں اننگز اور پانچ رنز سے شکست ہوگئی۔
مصباح کا کہنا تھا کہ ٹیسٹ اسکواڈ آسٹریلیا کو سرپرائز کرے گا، ٹیم نے آسٹریلیا کے بجائے پاکستانی فینز کو سرپرائز کردیا۔ آسٹریلیا کے خلاف گزشتہ سیریز میں 17 وکٹیں لینے والے محمدعباس کو ڈراپ کردیا گیا جبکہ حارث سہیل دونوں پریکٹس میچ میں ناکام ہوئے پھر بھی وہ ٹیم میں شامل ہیں۔
پہلا ٹیسٹ: آسٹریلیا کے ہاتھوں پاکستان کو شرمناک شکست
افتخار احمد بھی اپنی سلیکشن کو درست ثابت نہ کرسکے، یاسرشاہ نے 4 کھلاڑیوں کو آؤٹ کیا، لیکن 200 رنز بھی دیے، فیلڈنگ میں بھی پاکستان نے خوب بلنڈر کیے۔ ٹیسٹ چیمپئن شپ کا بھی ہار کے ساتھ آغاز کیا، اگلا میچ ایڈلیڈ میں پنک بال سے ہوگا، پاکستان کو حکمت عملی بدلنی ہوگی ورنہ میچ کے ساتھ سیریز بھی ہاتھ سے جائے گی۔
یاد رہے کہ ٹیسٹ چیمپئن شپ کے پہلے میچ میں پاکستان کو شرمناک شکست کا سامنا کرنا پڑا ہے، آسٹریلیا نے پہلے ٹیسٹ میچ میں پاکستان کو اننگز اور 5 رنز سے ہرا دیا۔
