اسلام آباد : وفاقی وزیر ریونیو حماد اظہر نے کہا ہے کہ فارن فنڈنگ کیس چائے کی پیالی میں طوفان اٹھانے کے مترادف ہے، اپوزیشن جماعتیں اسے اس طرح پیش کررہی ہیں جیسے کوئی بہت بڑی بات سامنے آگئی ہو۔
یہ بات انہوں نے سلام آباد میں میڈیا سے گفتگو کرتے ہوئے کہی، انہوں نے کہا کہ اس پہلے بھی الیکشن کمیشن اس کیس کو دس ماہ تک لے کر بیٹھا رہا اور اب جا کر سکروٹنی کمیٹی بنائی ہے، ہم اس کمیٹی کے سامنے ضرور پیش ہوں گے۔
وفاقی وزیر کا کہنا تھا کہ اپوزیشن جماعتیں فارن فنڈنگ کیس کو ایسا بنا کر پیش کر رہی ہے جیسے کوئی بہت بڑا کیس سامنے آگیا ہو، اس کیس کی مثال چائے کی پیالی میں طوفان کھڑا کرنے کے مترادف ہے۔
حماد اظہر نے کہا کہ قانون سب سیاسی جماعتوں پر یکساں لاگو کیا جائے، نہ پہلے کچھ چھپایا تھا اور نہ کچھ اب چھپائیں گے، اس کیس کو سیاسی کیس بنادیا گیا ہے.
اُن کا مزید کہا کہ موجودہ الیکشن باقی انتخابات کی نسبت زیادہ شفاف تھا ،یہ بات میں نہیں بلکہ عالمی ادارے کہہ رہے ہیں۔
مزید پڑھیں: فارن فنڈنگ کیس سے پی ٹی آئی کو کوئی خطرہ نہیں، فیصل چوہدری
واضح رہے کہ فارن فنڈنگ کیس کے معاملے پر پی ٹی آئی کے سابق وکیل فیصل حسین چوہدری نے ایک بیان میں کہا ہے کہ فارن فنڈنگ کیس سے پی ٹی آئی کوکوئی خطرہ نہیں، معاملہ فارن فنڈنگ نہیں بلکہ ممنوعہ فنڈنگ کا ہے۔
فیصل حسین چوہدری کا کہنا تھا کہ سپریم کورٹ 2018کےحنیف عباسی کیس میں واضح کر چکی ہے ، ممنوعہ فنڈنگ معاملے کو وفاقی حکومت دیکھنے کا اختیار رکھتی ہے، میڈیا میں کچھ دوست پرانے قانون کا حوالہ دے رہے ہیں، اپوزیشن رہنما بھی پرانے قانون کا حوالہ دے رہے ہیں جو ختم ہوچکا۔
