میکسیکو سے پیرو تک اور امریکا کے گرم علاقے ایک زمانے میں امردو کی کاشت کے لیے مشہور رہے ہیں. جنوب ایشیائی ممالک کی بات کی جائے تو یہاں اس کی کاشت سے ہزاروں ٹن پیداوار حاصل ہوتی ہے۔
پاکستان، بھارت، کیوبا، برازیل جیسے ملکوں میں امرود خوب کاشت کیا جاتا ہے۔ پاکستان میں یہ تمام صوبوں میں کاشت کیا جاتا ہے۔ یہ پھل سبھی کا پسندیدہ ہے اور اس کی خوب کھپت بھی ہے، مگر ہمارے ملک میں زراعت میں جدید تیکنیک اور آلات کا استعمال نہ ہونے کی وجہ سے امردو کو درخت سے حاصل کرنے کے لیے بھی روایتی طریقے اپنائے جاتے ہیں جس سے یہ بڑی تعداد میں ضایع ہو جاتا ہے۔
امرود کو وٹامن سی کے حصول کا بڑا ذریعہ کہا جاتا ہے۔ طبی ماہرین اسے ہاضم بتاتے ہیں جب کہ اس کے دیگر فوائد بھی ہیں۔ یہ پھل وٹامن سی، پوٹاشیم اور فائبر سے بھرپور ہوتا ہے۔ ان اجزا کی وجہ سے ماہرین اسے صحت کے لیے مفید مانتے ہیں۔
امرود کا پودا گرم مرطوب اور نیم گرم مرطوب خطوں میں کاشت کیا جاتا ہے۔ امرود کے درخت پر سال میں دو مرتبہ پھل آتے ہیں۔ اس کے پودے کو کافی مقدار میں کھاد کی ضرورت ہوتی ہے۔ امرود کے باغات میں اسے مختلف قسم کے کیڑے نقصان پہنچاتے ہیں جن سے بچاؤ کے لیے کیڑے مار ادویہ اور دیگر طریقے اپنائے جاتے ہیں۔
