کوئٹہ : وزیراعلیٰ بلوچستان جام کمال خان نے کہا ہے کہ صوبے کی معدنی وسائل کی تلاش و ترقی کے منصوبوں میں شراکت داری اور حقوق کے تحفظ کے لئے صوبائی حکومت کا مضبوط موقف ہے۔
ان خیالات کا اظہار انہوں نے سینیٹ کی مجلس قائمہ برائے پٹرولیم کے چیئرمین سینٹر محسن عزیز کی قیادت میں ملاقات کرنے والے وفد سے بات چیت کرتے ہوئے کیا۔
ملاقات میں بلوچستان کے معدنی وسائل اور تیل اور گیس کے منصوبوں پر بات چیت کی گئی اور مجلس قائمہ کے اراکین نے 18ویں ترمیم کے تناظر میں قدرتی وسائل کی ملکیت اور حقوق پر وزیراعلیٰ کے موقف کی تائید کرتے ہوئے یقین دلایا کہ مجلس قائمہ اس موقف کی بھرپور حمایت کرے گی۔
جام کمال نے کہا کہ 18ویں آئینی ترمیم کے تحت صوبے کو ملنے والے اختیارات سے بھرپور فائدہ اٹھانے کے لئے قانون سازی کا عمل جاری ہے، اس کے علاوہ صوبائی حکومت نے جامع منرل پالیسی متعارف کرائی ہے، جس میں معدنی ذخائر کے ساتھ ساتھ کانکنوں کے مفادات کے تحفظ کو بھی یقینی بنایا گیا ہے۔
مجلس قائمہ کی جانب سے وزیراعلیٰ کو بتایا گیا کہ انہوں نے گزشتہ روز پی ایم ڈی سی اور نجی شعبہ میں کوئلہ کانوں کا دورہ کرتے ہوئے وہاں دستیاب سہولتوں کا جائزہ لیا ہے۔
چیئرمین مجلس قائمہ نے کہا کہ کوئلہ کانکنوں کے لئے سہولیات کی انتہائی کمی ہے، پی ایم ڈی سی کو کانکنوں کے لئے بنیادی سہولیات صحت، تعلیم اور تربیت کی فراہمی کی ہدایت کی جائے گی۔
