لاہور : سیالکوٹ نجی ہاؤسنگ اسکیم کرپشن اسکینڈل میں نیب نے خواجہ آصف کی اہلیہ اور بیٹے کو کل طلب کرلیا اور ریکارڈلانے کی ہدایت کردی، ملزمان پر مبینہ طور پرپلاٹس کی غیرقانونی فروخت کا الزام ہے۔
تفصیلات کے مطابق قومی احتساب بیورو ( نیب ) نے مسلم لیگ ن کے رہنما خواجہ آصف کی اہلیہ اور بیٹے کو کل طلب کرلیا اور دونوں کو ریکارڈلانے کی ہدایت کی ہے جبکہ سابق میئرسیالکوٹ توحیداخترچوہدری بھی کل 11بجے طلب کیا گیا ہے۔
ذرائع نیب کا کہنا ہے کہ ملزمان پر مبینہ طور پرپلاٹس کی غیرقانونی فروخت کا الزام ہے ، ملزمان کے پاس 150کینال منظورشدہ اراضی تھی جبکہ ملزمان نے 400 کینال اراضی فروخت کردی۔
مزید پڑھیں : کروڑوں کاگھپلا، خواجہ آصف کی اہلیہ اور بیٹے کیخلاف تحقیقات کا آغاز
یاد رہے چند روز قبل نیب لاہور نے سیالکوٹ میں ہاؤسنگ اسکیم کی انکوائری کا آغاز کیا تھا اور متاثرین کی شکایات پر چیئرمین نیب نے انکوائری شروع کرنےکی منظوری دی تھی ، ذرائع کا کہنا تھا کہ نیب نے خواجہ آصف کی اہلیہ اور بیٹے کے اثاثوں کی تفصیل کیلئے خط لکھنے کا فیصلہ کیا تھا۔
ذرائع کا کہنا تھا کہ نیب کی جانب سے مالیاتی اداروں کو خط لکھنے کا فیصلہ کیا گیا جبکہ سابق میئر سیالکوٹ توحید اختر، نوید اختر بھی شامل تفتیش ہیں جبکہ ڈویلپر زاہد مقبول، شاہد مقبول کے اثاثہ جات بھی چیک کئے جائیں گے۔
ذرائع کے مطابق ملزمان پرہاؤسنگ اسکیم سیالکوٹ کےنام پرکروڑوں وصول کرنےکاالزام ہے، شامل تفتیش چندملزمان نیب لاہورمیں ابتدائی بیان ریکارڈ کراچکے ہیں۔
